پێرێز باس لە چارەنووسی ئانچێلۆتی دەکات

یاریگا –

سەرۆکی ریال مەدرید وەڵامی. تەواوی ئەو دەنگۆیانەی دایەوە، کە باس لە چوونە دەرەوەی کارلۆ ئانچێلۆتی دەکەن.

شەوی رابردوو، ریال مەدرید بۆ جاری 20ەم لە مێژوودا، نازناوی جامی شای ئیسپانیای بردەوە، دوای بردنەوەی لە ئۆساسونا، بە ئەنجامی 2-1.

فلۆرێنتینۆ پێرێز، سەرۆکی ریال مەدرید لە بارەی دەنگۆکانی پەیوەندی کردنی ئانچێلۆتی بە هەڵبژاردەی بەرازیلەوە، روونیکردەوە

زۆر دڵخۆشین لەگەڵ ئانچێلۆتی، نامەوێت گوێم لە دەنگۆکان بێت. هێشتا گرێبەستی لەگەڵ ئێمەدا ماوە.

لە چەند مانگی رابردوودا، ناوی ئانچێلۆتی، بەردەوام بە وەرگرتنی پۆستی راهێنەرایەتی هەڵبژاردەی بەرازیل بەستراوەتەوە و دیارترین پاڵێوراوە، بەڵام پێدەچێت، ریال مەدرید تاوەکو ئێستا بڕیاری کۆتایی لەسەر کارلۆ نەدابێت. پێرێز لە بارەی ناکۆکییەکانی ڤینیسیۆس جونیۆر لەگەڵ ناوبژیوانان، گوتی

ڤینیسیۆس باشترین یاریزانە لە شوێنی یاریکردنی خۆیدا. زۆر فاوڵی لە دژ دەگیرێت، کەچی بەردەوام ئەو کارتەکان وەردەگرێت، بەڕاستی لەمە تێناگەم، پێویستە یاریزانان پارێزراو بن.

لە بەشێکی دیکەی قسەکانیدا، پێرێز رەخنەی زۆری لە خشتەی یارییەکانی ئیسپانیای گرت

سێشەممە لە چامپیۆنزلیگ، بەرامبەر مانچێستەر سیتی یاری دەکەین، هیچ کاتمان بۆ پشوودان نییە. نازانم کێ خشتە و کاتی یارییەکان دادەنێت. بەڵام پێویستە پێداچوونەوەی تەواویان بۆ بکرێت.

ریال مەدرید لە یاری چوونی قۆناخی پێشکۆتایی چامپیۆنزلیگ رووبەڕووی مانچێستەر سیتی دەبێتەوە.