دۆخی دانی ئالڤێس زۆر خراپە و مانی لە خواردن گرتووە

یاریگا –

دانی ئالڤێس بڕیاریداوە مان لە خواردن بگرێت.

رۆژنامەی زە سەن بڵاویکردووەتەوە، دانی ئالڤێسی یاریزانی پێشووی بارسێلۆنا بڕیاریداوە، لە زیندان مان لە خواردن بگرێت، ئەمەش دوای بڕیاری جوانا سانزی هاوژینی بە جیابوونەوە لێی.

جوانا سانز، هاوژینی ئالڤێس لە پۆستێکی ئینستاگرامدا، جیابوونەوەی خۆی لە ئەستێرە بەرازیلییەکە راگەیاند، ئەمەش دوای تۆمەتبارکردنی بە دەستدرێژیکردنە سەر کچێک، لە یانەیەکی شەوانەی بارسێلۆنا.

کەناڵی ‘کۆتروا’ هەواڵی مانگرتنی ئالڤێس لە خواردن پشتڕاست دەکاتەوە، هۆکارەکەشی جیابوونەوەی هاوژینەکەیەتی.

بەگوێرەی دوایین زانیارییەکان، دانی ئالڤێس بە دۆخێکی زۆر هەستیاردا تێدەپەڕێت و تەواو پەشۆکاوە و زوو توڕە دەبێت، ئەمەش دوای بڕیارەکەی جوانا سانز دێت، تەنانەت هەندێ رۆژ، ئالڤێس هیچ شتێک ناخوات.

جوانا سانز زۆربەی وێنەکانی لەگەڵ ئالڤێس لە تۆڕە کۆمەڵایەتییەکان سڕیوەتەوە. تاوەکو ئێستاش هیچ لێدوانێکی لەبارەی مان گرتنی ئالڤێس لە خواردن نەداوە.

دادوەر هەموو هەوڵێکی پارێزەرانی بۆ ئازادکردنی ئالڤێس بە کەفالەت رەتکردووەتەوە. مانەوەی لە زیندانیش تاوەکو دەرچوونی بڕیاری دادگا بەردەوام دەبێت، رەنگە بۆ ماوەی چەندین ساڵ سزای زیندانی بۆ دەربچێت.

لە دوای رووداوەکە، یانەی پوماسی مەکسیسکی گرێبەستی ئالڤێسی هەڵوەشاندەوە و لە 20ی کانوونی دووەمی ئەمساڵ دەستگیرکراوە.