فەرمی: فیگۆرست پەیوەندی بە مانچێستەر یۆنایتدەوە كرد

یاریگا-

بەشێوەیەكی فەرمی یانەی مانچێستەر یۆنایتدی ئینگلیزی سەركەوتوو بوو لە گواستنەوەی وۆت فیگۆرست هێرشبەری هەڵبژاردەی هۆڵەندا و یانەی بێشكتاشی توركی.

هەژماری فەرمی مانچێستەر یۆنایتد لە تۆڕی كۆمەڵایەتی تویتەر گواستنەوەی فیگۆرستی بۆ ڕیزەكانی یانەكەیان ڕاگەیاند.

فیگۆرست لە یاریەكانی جامی جیهانی 2022ی قەتەڕ لەگەڵ هەڵبژاردەی هۆڵەندا ئاستێكی بەرزی پێشكەش كرد و بەجۆرێك لە قۆناغی چارەكی كۆتاییدا بەرامبەر ئەرجەنتین توانی دوو گۆڵ تۆمار بكات.

شەیتانە سوورەكان بە بڕی 2.5 ملیۆن یۆرۆ ماوەی خواستنەكەی فیگۆرستیان لەگەڵ بێشكتاش كۆتایی پێهێنا و لە بێرنلیەوە بە خواستن گواستیانەوە ڕیزەكانی یانەكەیان و لە گرێبەستەكەیدا بڕگەی كڕینەوەیان كارا كردووە.

هێرشبەرە 30 ساڵانەكە لەم وەرزەدا لەگەڵ بێشكتاش 18 یاری ئەنجامداوە و نۆ گۆڵی تۆمار كردووە و چوار گۆڵیشی درووست كردووە.