یاریگا–
دوای بڵاوبونەوەی گرتە ڤیدیۆیەک کە دەردەکەوێت ئانتوان گریزمان و عوسمان دێمبلی هەردوو یاریزانی هەڵبژاردەی فەرەنسا و یانەی بارسێلۆنا لە ساڵی 2019 گاڵتە بە کەسێکی ژاپۆنی دەکەن، کاردانەوەی زۆری بەدوی خۆیدا هێناوە و گەورە کۆمپانیایەکی ئەم وڵاتە گرێبەستەکەی لەگەڵ یەکێک لەو دوو یاریزانە هەڵوەشاندەوە.
رۆژنامەی وەرزشی مارکای ئیسپانی بڵاویکردەوە ساڵی 2019 بوو لە کاتی ئامادەکارییەکانی پێشوەختەی یانەی بارسێلۆنا بۆ وەرزی نوێ، گرتە ڤیدیۆکە لەلایەن عوسمان دێمبلیەوە تۆمار دەکرێت و گریزمانی هاونیشتیمانیشی گاڵتە بەو کەسە ژاپۆنیە دەکات، دوای دوو ساڵ گرتەکە بڵاودەبێتەوە و بەم هۆیەوە کۆمپانیای Konami بەرهەم هێنەری یارییەکانی PES کە ماوەیەک لەمەوبەر وەکو بالیۆزی براندەکەیان لەگەڵ ئانتوان واژۆ کرد بوو، گرێبەستەکەی هەڵوەشاندەوە.
مارکا ئەوەشی بڵاوکردەوە کە کۆمپانیای Rakutenـی ژاپۆنی و سپۆنسەری سەرەکی یانەی بارسێلۆناش ئەو یانەیەی ئاگادار کردووەتەوە پێویستە لێکۆلینەوە لەگەڵ ئەم دوو یاریزانە بکرێت لەسەر بڵاوکردنەوەی گرتە ڤیدیۆکە.
