کردەکە خێرا دەکرێت؛ ساتی راگەیاندنی مۆرینیۆ دیاریی دەکرێت

یاریگا –

ریال مەدرید دەیەوێت بە خێرایی گرێبەستی جۆزێ مۆرینیۆ وەکوو راهێنەری نوێی یانەکە رابگەیەنێت.

بێنفیکا بەردەوام چاوەڕوانی مۆرینیۆ دەکات، تاوەکوو بە فەرمی رەتکردنەوەی پێشنیاری نوێکردنەوەی یانەکە رابگەیەنێت و نیشانی بدات کە ئەو یانەکە بەجێدەهێڵێت، سەرەڕای ئەوەی هێشتا ساڵێک لە گرێبەستەکەی ماوە. شوێنی داهاتووی ئەو، وەکوو چۆن لە ئێستادا بە شێوەیەکی بەرفراوان زانراوە، ریال مەدرید دەبێت.

رۆژی دوای راگەیاندنی هەڵبژاردنەکانی یانەکە، فلۆرێنتینۆ پێرێز دانی بەوەدانا کە مۆرینیۆ لە ماوەیەکی سەختدا ئاستی رکابەریی تیمی بەرز کردەوە و بنچینەیەکی بۆ یانەکە دروست کرد، تاوەکوو شەش چامپیۆنزلیگ لە ماوەی 10 ساڵدا بەدەستبهێنێت. بە فەرمی گرێبەستکردنی لەگەڵ مۆرینیۆ پشتڕاست نەکردەوە، بەڵام زۆر کەس باوەڕیان وایە کە پێویستی بەوە نەبوو.

خودى مۆرینیۆ دوای یارییەکەی بەرامبەر ئێستۆریل پشتڕاستی کردەوە، کە فلۆرێنتینۆ پێرێز لەگەڵ بریکارەکەی، خۆرخی مێندێش قسەی کردووە. سەرەڕای چوونەنێو پرۆسەی هەڵبژاردن، دەستەی کارگێڕیی ریال مەدرید هێشتا خاوەنی ئازادی تەواوی یاساییە بۆ دەرکردنی بڕیارەکان. یانەکە رۆژی شەممە لە بێرنابیۆ بەرامبەر ئاتلێتیک بلباو لە کۆتا یاریی خولی ئەم وەرزە یاری دەکات.

فلۆرێنتینۆ هیواخوازە مۆرینیۆ رۆژی یەکشەممە رابگەیەنێت، بێگوێدانە ئەوەی ئایا رکابەرێکی لە هەڵبژاردنەکاندا دەبێت یان نا.

بۆ کۆتایی هەفتە، ئەوەش دەبێت روون بێتەوە ئایا ئێنریکێ ریکێلمیی بازرگان، کە بانگەشەی کەفالەتی پێویست بۆ بەشداریکردن دەکات، بە فەرمی ململانێی فلۆرێنتینۆ دەکات یان نا. لیستی بەربژێرەکان دەبێت تاوەکوو رۆژی شەممە پێشکەش بکرێن.

لەڕووی تیۆرییەوە، لە سیناریۆیەکدا کە ئێستا بەجدی سەیر ناکرێت، فلۆرێنتینۆ دەتوانێت راگەیاندنی دەستنیشانکردنی مۆرینیۆ تاوەکوو دوای ئەنجامی هەڵبژاردنەکان دوا بخات، بەڵام تەنیا ئەگەر ریکێلمی بەفەرمی بچێتە نێو پێشبڕکێکەوە. لەو دۆخەدا، ئەگەر فلۆرێنتینۆ سەرکەوتن بەدەستبهێنێت، دەتوانێت گەڕانەوەی ئەو راهێنەرە پۆرتوگالییە وەکوو پاڵپشتییەکی هەڵبژاردن بەکاربهێنێت و پێشکەشکردنی مۆرینیۆ لەبری ئەوە دەکرێت بۆ 9 یان 10ی حوزەیران دیاریی بکرێت.

لەگەڵ ئەوەشدا، سیناریۆی زیاتر پێشبینیکراو ئەوەیە کە ریال مەدرید بە سادەیی بڕی مەرجی هەڵوەشاندنەوەی گرێبەستەکەی مۆرینیۆ دەدات. جێبەجێکردنی ئەمە تاوەکوو رۆژی یەکشەممە هێشتا لەنێو ئەو مۆڵەتە 10 رۆژییەدا دەبێت، کە مۆرینیۆ خۆی بۆ دەرکردنی بڕیاری کۆتایی ئاماژەی پێکردبوو.