پێرێز تۆقیوە؛ هۆکاری هەڵبژاردنی پێشوەختەی پێرێز ئاشکرا دەکرێت
ستراتیژییەک بۆ پاراستنی دەسەڵات
یاریگا –
فلۆرێنتینۆ پێرێز و هەڵبژاردنە پێشوەختەکان، ستراتیژییەک بۆ پاراستنی دەسەڵات لە هەڕەشە جدییەکان.
فلۆرێنتینۆ پێرێز کە بڕیار بوو سەرۆکایەتییەکەی لە ریال مەدرید تاوەکوو ساڵی 2029 بەردەوام بێت، تەنیا بۆ گەڕاندنەوەی کۆنترۆڵی میدیایی دوای شکستە وەرزشییەکانی ئەم دواییە پەنای بۆ پێشخستنی هەڵبژاردنەکان نەبردووە. بۆ یەکەمجار لە دوای ماوەیەکی درێژ، دەگوترێت کەسە نزیکەکانی لە هەڕەشەیەکی جدی بۆ سەر دەسەڵاتەکەی هەستیان بەترس کردووە.
بەگوێرەی سەرچاوە نزیکەکان لە سەرکردایەتی ئێستای ریال مەدرید، فلۆرێنتینۆ زانیاری پێگەیشتووە کە گروپێکی ئۆپۆزسیۆنی بەهێز لە دەوری ئێنریکێ ریکێڵمی، سەرۆکی کۆمپانیای Cox، دروست بووە. ئەم گروپە وەکوو هەڕەشەیەکی راستەقینە لە ماوەی کەمتر لە ساڵێکدا بینراوە، بە پاڵپشتی کەسایەتییە کاریگەرەکان لە بوارە جیاوازەکاندا و هێزێکی پێویست بۆ کاریگەری دروستکردن لەسەر ئەگەری ریفراندۆمی ساڵی 2027 سەبارەت بە گۆڕینی پێکهاتەی خاوەندارییەتی یانەکە.
یەکێک لە هاوپەیمانە هەرە نزیکەکانی فلۆرێنتینۆ دوای بانگەوازی هەڵبژاردنە پێشوەختەکە گوتوویەتی: “هیوادارین ئێستا کاتی پێویستیان نەبێت بۆ ئەوەی خۆیان بەربژێر بکەن.”
ئەم ئۆپەراسیۆنە خێرایە لە ئێستاوە ئەوەی بەدەست هێناوە، کە بازنەی نزیکی پێرێز بە یەکەم سەرکەوتن دای دەنێن: رافایێل نادال بە ئاشکرا خۆی لەو دەنگۆیانە دوور خستەوە کە دەیانگوت دەبێتە سەرۆکی فەخری لە ئەگەریی بەربژێرکردنی ریکێڵمیدا.
هەمووی درۆیە؛ نادال بێدەنگی شکاند و وەڵامی دەنگۆکان دەداتەوە
خودی ریکێڵمی نامەیەکی بۆ فلۆرێنتینۆ ناردووە و داوای پرۆسەیەکی هەڵبژاردنی فراوانتری کردووە کە رێگە بە بەشدارییەکی زیاتری ئەندامان و هاندەرانی یانەکە بدات. هەروەها بانگەشەی ئەوەی کردووە کە ساڵانی پێویستی وەکوو ئەندام هەیە و گرەنتی دارایی پێویستیشی بۆ خۆبەربژێرکردن ئامادەیە.
فلۆرێنتینۆ لە کاتی چاوپێکەوتنەکەیدا لەگەڵ خۆسێ پێدرێرۆڵ وەڵامی دایەوە:
کاتێک لە ساڵی 2000 بانگەواز بۆ هەڵبژاردن کرا، من داوام نەکرد دوابخرێت. خۆم بەربژێر کرد و بردمەوە.
لیژنەی هەڵبژاردن بە فەرمی پرۆسەی هەڵبژاردنەکەی لە رۆژی هەیینی چالاک کرد و ریکێڵمی تاوەکوو 23ـی ئایار کاتی لەبەردەمدایە بۆ ئەوەی بڕیار بدات ئایا بە فەرمی خۆی بەربژێر دەکات یان نا.
سەرەڕای کاتی کورت، سەرچاوەکان پێیان وایە ریکێڵمی هێشتا دەتوانێت بەربژێربوونی خۆی رابگەیەنێت. دەگوترێت جووڵەکەی پێرێز ئەو کاتە بووە کە ئەو لە دەرەوەی وڵات بووە و رێکخستنی تیمەکەی بۆ قورس کردووە، بەڵام هاوکات خستوویەتییە نێو چەقی سەرنجەکانەوە. ئەگەر هیچ نەکات، وەکوو کەسێکی بێ ئامادەکاری دەردەکەوێت. ئەگەر بچێتە نێو کێبڕکێکەوە، تەنانەت زووتر لەوەی چاوەڕوان دەکرا، دەکرێت ببێتە سیمبولێک بۆ ئەو هاندەرانەی پێیان وایە سەردەمی قرشە سپییەکە بەرەو کۆتایی دەچێت.
ریکێڵمی بڕیاریداوە بگەڕێتەوە بۆ ئیسپانیا بۆ بینینی هاوکار و هاوپەیمانە ئەگەرییەکانی تاوەکو بڕیار لەسەر هەنگاوەکانی داهاتوو بدات، بەو باوەڕەی کە دەرفەتێکی گرنگ کراوەتەوە.
ترس و ئەگەرەکانی هاوپەیمانی
دەگوترێت پێرێز تەنیا لە خودی ریکێڵمی ناترسێت، بەڵکوو لەو کەسانەش دەترسێت کە لە پشتییەوەن، بەتایبەت دەیڤید مێسۆنێرۆ، زاوای سەرۆکی کۆمپانیای ئیبێردرۆلا، ئیگناسیۆ سانچێز گالان. لەنێو ریال مەدریددا نیگەرانی هەیە کە ریکێڵمی بتوانێت گروپە جیاوازەکان یەکبخات کە ئارەزووی سەردەمێکی دوای فلۆرێنتینۆ دەکەن: وەکوو ئەفسانە کۆنەکانی یانەکە کە لە سەرۆک دوورکەوتوونەتەوە، هاوشێوەی ئیکەر کاسیاس یان راوول گۆنزالێز، بازرگانە گەورەکانی ئیسپانیا کە بەدوای هەژمووندا دەگەڕێن لە ناو یانەکەدا و تەنانەت کەسایەتییە پەیوەندیدارەکان بە دامەزراوە سیاسییەکانەوە.
هەندێک لایەنیش رەخنەی توند لە شێوازی سەرکردایەتییە کەسییەکەی فلۆرێنتینۆ دەگرن کە لە کۆنگرە رۆژنامەوانییەکەی رۆژی سێشەممەدا پشانیدا. هەروەها نادڵنیایی هەیە سەبارەت بەوەی ئایا دەرکەوتنە میدیاییەکانی فلۆرێنتینۆ دەکرێت لە کۆتاییدا لە جیاتی سوود، زیان بە ستراتیژییەکەی بگەیەنن. دوای تەقینەوەی کۆنگرە رۆژنامەوانییە رۆژی سێشەممە، دواتر لەگەڵ خۆسێ پێدرێرۆڵ لە کەناڵی La Sexta دەرکەوت لە هەوڵێکدا بۆ هێورکردنەوەی کەسایەتیی خۆی.خشتەی هەڵبژاردن و فشارەکان
دوای چالاککردنی فەرمیی پرۆسەکە، کاندیدەکان تاوەکوو 23ـی ئایار کاتیان هەیە بۆ خۆتۆمارکردن. پاشان لیژنەی هەڵبژاردن پێداچوونەوە بە داواکارییەکان، گرەنتییەکان، لیستی بەربژێرەکان و تانە دەکات. ئەگەر زیاتر لە بەربژێرێک هەبێت، دەنگدان لەنێوان ناوەڕاست تاوەکوو کۆتایی مانگی حوزەیران بەڕێوەدەچێت.
ئەمە کاتێکی زۆر کەم بۆ ئۆپۆزسیۆن دەهێڵێتەوە بۆ بنیادنانی پڕۆژەیەکی تەواو. یاساکانی ریال مەدرید خۆپاڵاوتن بۆ سەرۆک قورس دەکەن، چونکە کاندیدەکان پێویستیان بە ساڵانێکی زۆر ئەندامییەتی، تیمێکی کارگێڕی تەواو و گرەنتی دارایی زەبەلاح هەیە، کە پەیوەستە بە بودجەی یانەکەوە.
لە کەیسی ریکێڵمیدا، دەگوترێت کێشەکە پارە نییە، بەڵکوو ئەوەیە ئایا دەتوانێت بە خێرایی پڕۆژەیەکی بەهێز و ناسراوی جێگرەوە دروست بکات یان نا.
ستراتیژییەکەی فلۆرێنتینۆ لەسەر فشاری کات بنیات نراوە:
ئەگەر ریکێڵمی خۆی بەربژێر نەکات، پێرێز دەتوانێت بڵێت هەرگیز جێگرەوەیەکی راستەقینە نەبووە.
ئەگەر ریکێڵمی بەبێ ئامادەکاریی تەواو خۆی بەربژێر، پێرێز دەتوانێت وەکوو کەسێکی بێ ئەزموون نیشانی بدات.
بەڵام ئەم ستراتیژییە سەرکێشیشی تێدایە: بە ناساندنی ریکێڵمی وەکوو هەڕەشە بەشێوەیەکی ئاشکرا و خێراکردنی جەنگەکە، فلۆرێنتینۆ دەکرێت لەراستیدا فشاری لێبکات بۆ ئەوەی بە فەرمی خۆی بپاڵێوێت.
لاغراری و ئەو چاکسازییەی فلۆرێنتینۆ پێرێز دەیەوێت بیپارێزێت
لەپشت هەڵبژاردنەکانەوە بابەتێکی دیکەی گەورە هەیە: گۆڕینی دەستووری یانەکە.
دەگوترێت فلۆرێنتینۆ نەوەکوو تەنیا دەیەوێت لە هەڵبژاردنەکاندا بیباتەوە، بەڵکوو دەیەوێت رەوایەتی بەدەست بهێنێت بۆ پەسەندکردنی ئەو چاکسازییانەی کە رێگە بە وەبەرهێنەرە تایبەتەکان دەدەن بێنە نێو پێکهاتەی سەرمایەی یانەکەوە. بیرۆکەکە ئەوەیە ریال مەدرید لەڕووی داراییەوە بەهێز بکرێت دوای پڕۆژە گەورەکەی بێرنابیۆ و دروستکردنی پێکهاتەیەکی کارگێڕی پیشەگەرتر، هاوشێوەی کۆمپانیا مۆدێرنەکان کە کەسایەتییەکی بەهێزی وەکوو بەڕێوەبەری جێبەجێکار هەبێت.
لێرەدا ئەنەس لاغراری گرنگی پەیدا دەکات.
ئەم وەبەرهێنەرە فەرەنسی-مەغریبییە، کە لە زۆربەی کارە بازرگانییە گەورەکانی ئەم دواییەی ریال مەدریددا بەشدار بووە، وەکوو یەکێک لە پاڵپشتیکەرە هەرە بەهێزەکانی بانگەوازکردن بۆ هەڵبژاردنی پێشوەختە پێش بەهێزبوونی ئۆپۆزسیۆن وەسف دەکرێت. هەندێک کەس لەنێو یانەکەدا بە رەخنەوە وەکوو راوێژکاریی نهێنیی ناوی دەبەن؛ کەسێک بەبێ پۆستی فەرمی، بەڵام بە دەروازەیەکی راستەوخۆ بۆ فلۆرێنتینۆ و کاریگەرییەکی گەورە لەسەر بڕیارە ستراتیژییەکان.
لە سەرەتادا تەنیا لەسەر بابەتە داراییەکان بوو، بەڵام لاغراری ئێستا زیاتر و زیاتر لە بڕیارە وەرزشییەکانیشدا بەشدار دەبێت. سەرچاوەکان دەڵێن ئەو یەکێک بووە لە کەسە پەیوەندیدارەکانی یانەکە لەگەڵ ئاژانسی Best of You، کە نوێنەرایەتی ئاربێلۆا و چەندین یاریزانی تیمی یەکەم دەکات.
ئەمە وەکوو دەگوترێت گرژیی لەگەڵ خۆسێ ئانخێل سانچێز، بەڕێوەبەری گشتی ریال مەدرید و بەشی وەرزشی دروست کردووە. هەرچەندە چاوەڕوان دەکرێت سانچێز لەنێو دەستە پێشنیارکراوەکەی پێرێزدا بمێنێتەوە، بەڵام دەکرێت لە داهاتوودا دەسەڵاتی کەم ببێتەوە.
