یاریگا –
دوای بانگەوازکردن بۆ هەڵبژاردنی نوێی سەرۆکایەتی، فلۆرێنتینۆ پێرێزی سەرۆکی ریال مەدرید پێویستە دەستلەکار بکێشێتەوە.
“داوای لێبووردن دەکەم کە پێتان دەڵێم دەستلەکار ناکێشمەوە”، بەم وشانە فلۆرێنتینۆ پێرێز کۆنگرە رۆژنامەوانییەکەی رۆژی سێشەممەی دەستپێکرد. بەڵام هەر دوای ئەوە رایگەیاند کە داوای لە دەستەی کارگێڕیی یانەکە کردووە دەست بە پرۆسەی هەڵبژاردن بکەن.
وردەکارییە سەرەکییەکە ئەوەیە کە فلۆرێنتینۆ، کە وا بڕیار بوو ماوەی سەرۆکایەتییە ئێستاکەی تاوەکوو ساڵی 2029 بەردەوام بێت، پلانی هەیە دووبارە لەو هەڵبژاردنانەدا خۆی بەربژێر بکاتەوە. بۆیە دەبێت بە فەرمی دەستلەکار بکێشێتەوە بۆ ئەوەی ببێتە بەربژێر.
ئێستا دەمێنێتەوە بزانرێت ئایا هیچ رکابەرێکی دەبێت لە پرۆسەی هەڵبژاردنەکەدا. ماوەی هەڵبژاردنەکان بەندە بەوەی کەی راگەیاندنی فەرمی دەکرێت. ئەگەر تەنیا یەک بەربژێر هەبێت، وەکوو ئەوەی لە هەڵبژاردنەکانی پێشوودا روویدا، پرۆسەی راگەیاندنی فەرمی سەرۆک ئەگەری زۆرە لە 15 رۆژ زیاتر نەخایەنێت. ئەگەر بەربژێری زیاتر بچنە نێو پێشبڕکێکەوە، پرۆسەکە دەکرێت تاوەکوو مانگێک بخایەنێت.
بۆ ئێستا، هەموو شتێک بەندە بەوەی کەی بە فەرمی بانگەواز بۆ هەڵبژاردنی سەرۆکایەتی دەکرێت. بۆ ئێستا فلۆرێنتینۆ پێرێز تەنیا کەسە کە بە ئاشکرا پشتڕاستی کردووەتەوە کە بەنیازی خۆبەربژێرکردنە.
