زریانێک هەڕەشە لە خراپتربوونی قەیرانەکانی ریال مەدرید دەکات

یاریگا –

ئەو زریانەی دەوری ریال مەدریدی گرتووە دوای دۆڕانی تیمەکە لە کلاسیکۆدا بەردەوامە لە گەورەبوون، دۆڕانێک کە بێنازناوی ئەم وەرزەی مسۆگەر کرد و قەیرانەکانی دەوری یانەکەی قووڵتر کردەوە.

دۆڕانی 2-0 بەرامبەر بە بارسێلۆنا لە سپۆتیفای کامپ نۆو وەکوو نزمترین ئاستی وەرزێکی کارەساتبار بینرا، بەڵام راپۆرتەکان لە ئیسپانیا دەڵێن رەنگە خراپتر لەوەش لە رێگادا بێت. ئێستا سەرنجەکان چوونەتەسەر یاریی رۆژی پێنجشەممە بەرامبەر بە ریال ئۆڤیێدۆ لە سانتیاگۆ بێرنابیۆ، کە چاوەڕوان دەکرێت هاندەران بە توندی ناڕەزایەتی بەرامبەر بە تیمەکە دەرببڕن.
بەگوێرەی راپۆرتەکە، هیچ کەس لەنێو یانەکەدا لە رەخنەکان بێبەش نابێت. فلۆرێنتینۆ پێرێزی سەرۆکی یانە، ئالڤارۆ ئاربێلوای راهێنەر و چەندین یاریزان هەموویان لەژێر فشاردان دوای وەرزێک کە پڕ بوو لە ئەنجامی بێئومێدکەر، گرژی ناوخۆیی و مشتومڕ.

چاوەڕوان دەکرێت یەکێک لە ئامانجە سەرەکییەکانی توڕەیی هاندەران کیلیان ئێمباپێ بێت. ئەستێرە فەرەنسییەکە لە هەفتەکانی رابردوودا بە توندی رەخنەی لێگیراوە بەهۆی پشووە گشتییەکانی لە کاتی قۆناخی سەختی یانەکە و گەیشتنی کەمێک پێش یارییەکەی ئێسپانیۆل، هەروەها پێکەنینی لە کاتی بڵاوبوونەوەی راپۆرتەکانی ململانێی نێو ژووری خۆگۆڕین لەنێوان فێدێ ڤاڵڤێردی و ئۆرێلیەن چوامێنی، بڵاوکردنەوەی “هالا مەدرید” لە تۆرە کۆمەڵایەتییەکان لە کاتی کلاسیکۆدا دوای ئەوەی بارسێلۆنا 2-0 لەپێش بوو.

راپۆرتەکە باسی ئەوەش دەکات کە چاوەڕوان دەکرێت یاریزانانی وەک ڤینیسیۆس جونیۆر، جود بێلینگهام و ئێدواردۆ کاماڤینگاش رووبەڕووی رەخنەی هاندەران ببنەوە.

لەم نێوەندەدا،بەگوێرەی راپۆرتەکان فلۆرێنتینۆ پێرێز خۆی بۆ هاوینێکی چارەنووساز ئامادە دەکات. لەپێشینەی سەرەکی دۆزینەوەی راهێنەرێکی نوێیە بۆ جێگرتنەوەی ئاربێلوا و راپۆرتەکان لە ئیسپانیاوە ئاماژە بەوە دەکەن کە جۆزێ مۆرینیۆ ئێستا بەربژێری سەرەکییە بۆ ئەوەی جارێکی دیکە سەرپەرشتی ریال مەدرید بگرێتە ئەستۆ.