هەنگاوی دواتر؛ ریال مەدرید لەبەردەم گرێبەست، رۆیشتن و نوێکردنەوەی گرێبەستەکان

یاریگا –
ریال مەدرید دەزانێت هاوینێکی گەورەی لەپێشە ئەگەر بیەوێت تیمێکی کێبڕکێکار دروست بکاتەوە.

هەر کە ئالیخاندرۆ هێرناندێز هێرناندێزی ناوبژیوان فیکەی کۆتایی لە سپۆتیفای کامپ نۆو لێدا و بارسێلۆنا بە فەرمی بوو بە پاڵەوانی لالیگا، ریال مەدرید پیرۆزبایی لە رکابەرەکەی کرد و گەڕایەوە بۆ ژووری خۆگۆڕین لەکاتێکدا دەیانزانی کە لە واقعدا وەرزەکە کۆتایی هاتووە.

بە فەرمی نا، چونکە هێشتا سێ یاری خولەکە ماوە، بەڵام لە رووی کردارییەوە کۆتایی هاتووە چونکە مەدرید چیدیکە هیچ دەرفەتێک بردنەوەی نازناوی لەم وەرزەدا نەماوە. تەنیا ئامانجیان ئێستا پاراستنی شکۆی یانەکەیە لە یارییەکانی بەرامبەر ریال ئۆڤیێدۆ، سێڤییا و ئاتلێتیک بلباو.

هەر بۆیە ئێستا یەک پرسیار بەسەر یانەکەوە هەیە، بەتایبەت لەنێو هاندەران: دوای ئەمە چی روودەدات؟ هاندەران دەپرسن ئایا گۆڕانکاری گەورە لە دوای دوو ساڵ بەبێ نازناو دێت، ئایا فرۆشتنی گرنگ یان گرێبەستی نوێ دەبێت. هەرچەندە تاوەکوو ئێستا هیچ جوڵەیەکی روون نییە.

یەکەم شت راهێنەرە

هەرچەندە هێشتا هیچ شتێکی فەرمی نییە، بەڵام پرسێک وەکوو لەپێشینەی رەها دەبینرێت: دەستنیشانکردنی راهێنەرێکی نوێ. لەنێو ئەو ناوانەی بەردەوام بەم پۆستەوە دەبەسترێنەوە؛ یۆرگن کڵۆپ، ماوریسیۆ پۆچێتینۆ و دیدیێ دیشامپ هەن، ئەو ناوەی لەم دواییانەدا زۆرترین دەنگی داوەتەوە جۆزێ مۆرینیۆیە، بەتایبەت دوای رووداوەکانی ژووری خۆگۆڕین لەنێوان ئۆریلیەن چوامێنی و فێدی ڤاڵڤێردی.

راهێنەرە پورتوگالییەکە، کە هێشتا دەبێت وەرزەکە لەگەڵ بێنفیکا کۆتایی پێبهێنێت، وا دەردەکەوێت ئامادەی گەڕانەوە بێت. هەرچەندە ئەو کەسایەتییەکی مشتومڕاوییە، بەڵام وێنەی ئەو بۆ رێسا و دەسەڵات زیاتر و زیاتر لەنێو یانەکەدا بەرز دەنرخێنرێت، بەتایبەت لەلایەن فلۆرێنتینۆ پێرێزەوە.

دووەم شت پێکهاتەکە دێت

بێگومان بۆ ئەوەی هەر راهێنەرێک لە ریال مەدرید سەرکەوتوو بێت، پێویستی بە گروپێکی گونجاو لە یاریزانان هەبێت. هەرچەندە هاوینێکی پڕ لە گۆڕانکاری توند چاوەڕوان ناکرێت، بەڵام ناوە روونەکان بە ئەگەری هاتنیان بەستراونەتەوە وەکوو نیکۆ پاز، ئێندریک و ڤیکتۆر مونۆز. هەروەها یاریزانانی وەکوو دانی سیبایۆس، دەیڤید ئالابا و دانی کارڤاخال رەنگە یانەکە جێبهێڵن.

زۆر شت بەندە بە داواکارییەکانی مۆرینیۆ، یان هەر کەسێک کە لە کۆتاییدا ببێتە راهێنەری نوێ. یەکێک لەو پێگانەی کە بە روونی پێویستی بە بەهێزکردن هەیە دڵی بەرگرییە، کە نیکۆ شلۆتێربێک لە بۆرووسیا دۆرتموند و ئیبراهیما کۆناتێ لە لیڤەرپوول وەکوو بژاردەی راستەقینە دەبینرێن.

لەنێو ناوەڕاستکارانیشدا، ناوی وەکوو رۆدری لە مانچستەر سیتی و ئێنزۆ فێرناندێز لە چێڵسی بە بەهێزی ناویان بە یانەکەوە بەستراوەتەوە، وەکوو یاریزانانێک کە توانای هێنانی پێکهاتە و ناسنامەی یارییان هەیە کە مەدرید ئێستا نییەتی.

کێشەی ڤینیسیۆس یانەکەی نیگەران کردووە

پرسێکی دیکەی گەورە بارودۆخی ڤالڤێردی و چوامێنییە. چاوەڕێ ناکرێت هیچ کام لەو دوو یاریزانە بڕۆن، بەڵام ململانێی نێوانیان وەکوو شتێک دەبینرێت کە دەکرێت بە هەمیشەیی کاریگەری لەسەر کەشی ژووری خۆگۆڕین هەبێت.

هەروەها نوێکردنەوەی گرێبەستی ڤینیسیۆس جونیۆر هەیە، کە ریال مەدرید دەیەوێت ئەم هاوینە چارەسەری بکات. گرێبەستی یاریزانە بەڕازیلییەکە لە حوزەیرانی 2027 کۆتایی دێت و یانەکە نایەوێت بچێتە وەرزی داهاتوو بەبێ درێژکردنەوەی گرێبەستەکەی.

ئەمە دەکرێت ببێتە گەورەترین کێشەی هاوین. بەگوێرەی راپۆرتەکان ڤینیسیۆس دەیەوێت هەمان مووچەی ئێمباپێ وەربگرێت کە نزیکەی 30 ملیۆن یۆرۆیە لە ساڵێکدا، بەڵام مەدرید دوودڵە لە پێشکەشکردنی ئەو ژمارانە دوای ئەوەی یانەکە وەکوو وەرزێکی لاواز لەلایەن یاریزانە بەڕازیلییەکەوە دەیبینێت.

لەنێو یانەکەدا، ئەم بارودۆخە نیگەرانی جدی دروست کردووە. ڤینیسیۆس وەکوو یەکێک لە گەورەترین ئەستێرە و سەرمایەکانی ریال مەدرید دەمێنێتەوە، بەڵام دانوستانەکان زیاتر و زیاتر ئاڵۆز دەبن.

هاوینێک بە جامی جیهانی وەکوو سەرقاڵکردن

ریال مەدرید لە ئیستاوە دەستی بە ئامادەکاری بۆ وەرزی داهاتوو لە هاوینێکی بێوێنەدا کردووە، کە مۆندیال لە ناوەڕاستی هەموو ئەمانەدا روودەدات. پاڵەوانییەتییەکە دەکرێت بۆ دوورخستنەوەی سەرنج لە کێشە ناوخۆییەکانی یانەکە یارمەتیدەر بێت، یان تەنانەت دەرفەتی نوێی گواستنەوە بۆ مەدرید بڕەخسێنێت، چونکە لە رووی مێژووییەوە زۆرێک لەو ئەستێرانەی لە گەورەترین شانۆی نێودەوڵەتی تۆپی پێدا دەدرەوشێنەوە، لە کۆتاییدا روو لە بێرنابیۆ دەکەن.