بەهۆی ئەنجامە باشەکان؛ مانچێستەر یونایتد بۆچوونی خۆی لەسەر مایکڵ کاریک دەگۆڕێت

یاریگا –

مانچێستەر یونایتد هەڵوێستی خۆی سەبارەت بە مایکڵ کاریک دەگۆڕێت و ئەگەر هەیە لە وەرزی داهاتوو بیکاتە راهێنەری هەمیشەیی.

فابریزۆ رۆمانۆ، رۆژنامەنووسی باوەڕپێکراو، لە کەناڵی یوتیوبی خۆی ئاشکرای دەکات، بۆچوونی بەرپرسانی شەیتانە سوورەکان سەبارەت بە کارەکانی مایکڵ کاریک زۆر ئەرێنییە و رۆژ بەدوای رۆژ ئەگەری مانەوەی راهێنەرەکە لە ئەرکەکەی بۆ وەرزی داهاتوو زیاتر دەبێت.

فابریزۆ دەشڵێت، کەشی نێو پێکهاتەی یانەکە زۆر ناوازەیە و یاریزانەکان لەگەڵ کاریک زۆر دڵخۆشن.

هەفتە بە هەفتە، بۆچوونەکان لەسەر مایکڵ کاریک ئەرێنیتر دەبێت و هەمووان بە کارەکانی سەرسام بوونە، دەرفەتێک هاتووەتە پێش و رەنگە وەرزی داهاتوو لە ئەرکەکەی بەردەوام بێت.

کاریک لەدوای دوورخستنەوەی رۆبن ئامۆریم بە شێوەی کاتی وەکوو راهێنەری شەیتانە سوورەکان دەستنیشانکرا و تاوەکوو کۆتایی وەرز یارییەکانی یانەکە بەڕێوەدەبات، تاوەکوو ئێستا سەرپەرشتی حەوت یاریی یانەکەی کردووە و لە شەش یارییدا براوە بووە و تەنیا یارییەک یەکسان بووە.

بەگوێرەی هەمان سەرچاوە، هێشتا مانچێستەر یونایتد بڕیاری کۆتایی لەسەر راهێنەری داهاتووی نەداوە و پێشبینی دەکرێت لەپێش دەستپێکردنی مۆندیالی 2026، ئەو پۆستە یەکلایی بکرێتەوە.

هاوکات، بەگوێرەی سەرچاوە میدیاییەکان چەندین ناوی گەورە بۆ پۆستی راهێنەرایەتی یانەکە پاڵێوراون، لەوانە؛ یۆرگن کڵۆپ، رۆبێرتۆ دی زێربی.