یاریگا –
لە ئینگلتەرا لاوێک هاتووەتە ناو جیهانی تۆپی پێوە کە رەنگە لە یارییەکەی ئەمڕۆ، چارەنووسی گرنگترین یاری هەفتە یەکلایی بکاتەوە.
ماکس دۆومان، بووەتە یەکێک لە دیاردە گەورەکانی تۆپی پێی ئینگلتەرا. تەمەنی 15 ساڵە و هێشتا نەگەیشتووەتە تەمەنی یاسایی، بەڵام ئەزموونی یاریی کردنی لە پرێمەرلیگ بەدەستهێنا.
لە تۆپی پێی سەردەمیانە یانە گەورەکان زیاتر دەرفەت بە لاوەکان دەدەن. تا ئەم دواییانە، دەرفەت بە یاریزانە لاوەکان لە تیپی یەکەم بەتایبەت ئەوانەی لە ریزەکانی لاوانی هەمان یانە پەرەیان پێدراوە دەدرێت بێ گوێ دانە تەمەنیان.
لەم ساڵانەی دواییدا ئارسیناڵ بووە بە یەکێک لە سەرکەوتووترین ناوەندەکانی پەرەپێدانی بەهرەمەندەکان لە جیهاندا: ئیتان ئەنوانی، لویس سکێڵی، بوکایۆ ساکا و گابرێل مارتینێلی لە نموونەکانی ئەم دواییەن کە ئێستا لە پێکهاتەی تیپی یەکەمی گەنەرز دەدرەوشێنەوە. دواهەمینییان ماکس دۆومانە، ئەو یاریزانەی لەم هاوینەدا بە تایبەتی زیاتر درەوشاوەتەوە، یاریزانە لاوەکە هەموو ریکۆردەکانی ساڵانی سەرەتای شکاندووە و لەوەش گرنگتر ئارتێتا بڕوای تەواوی بە تواناکانی هەیە. تەمەنی تەنیا 15 ساڵە، بەڵام توانا و شێوازی یاریکردنی بە هیچ شێوەیەک لەگەڵ تەمەنی ئەو لاوەدا ناگونجێت.
تواناکانی سەرنجی راهێنەرە ئیسپانییەکە راکێشا، ئەمەش بووە هۆی ئەوەی کە لە کۆتایی وەرزدا بانگهێشتی تیپی یەکەمی بکرێت و بۆ یارییەکانی پێش وەرز لەگەڵیاندا گەشت بکات. دۆومان یەکەم یاری خۆی بەرامبەر میلان لە ئامادەکارییەکانی پێش وەرزدا کرد و تواناکانی خۆی نیشاندا، لە دووەم یاری دۆستانەدا بەرامبەر نیوکاسڵ دووبارە بەهەمان شێوە دەرکەوتەوە و بووە هۆی ئەوەی لێدانێکی سزا لە بەرژەوەندی تیپەکەی بگیرێت و بەم لێدا سزایە ئارسیناڵ یارییەکەی بردەوە. هەر ئەوکات ئارتێتا بۆی دەرکەوت کە گەوهەرێکی لەبەردەستە.
ئارتێتا لەبارەی ناوەڕاستکارە لاوەکە لە پێش وەرزدا گوتی:
دۆومان بەهرەیەکی گەورەی هەیە. هەندێک لەو کارانەی لە مەشقەکاندا دەیکات باوەڕپێنەکراوە، متمانەیەکی زۆرمان هەیە کە دەتوانێت پێشبکەوێت و ببێتە یاریزانی تیپی یەکەم.
چەند هەفتەیەک دواتر، لە هەفتەی دووەمی پرێمەرلیگدا، دۆومان یەکەم یاری فەرمی خۆی لەگەڵ ئارسیناڵ کرد. ئەو بەهرەمەندە لاوە ئینگلیزییە لە تەمەنی 15 ساڵ و 8 مانگیدا بووە دووەم لاوترین یاریزان لە مێژووی ئارسیناڵدا کە بەشداری یارییەکی فەرمی بکات. بەو پێیەی هێشتا تەمەنی نەبووەتە 16 ساڵ، ناتوانێت لە چامپیۆنزلیگ یاری بکات یان لە ژووری جلگۆڕینی تیپی یەکەمدا بێت؛ ژووری جلگۆڕینی تایبەتی خۆی هەیە و هەموو کاتێک کەسێکی دیکە سەرپەرشتی دەکات.
🚨JUST IN! 💣
Max Dowman travelled with the squad for Liverpool clash tomorrow at Anfield. 🏴 🌟 pic.twitter.com/ESZ5Qebfag
— AFC Xtra (@AFC__Xtra) August 30, 2025
خێرایی و تەکنیکی و گۆڵکردن، هەموو ئەو سیفەتانەن کە دۆومان هەیەتی و وادەکا کە لە ساڵانی داهاتوودا ببێتە ئەستێرەیەکی جیهانی. بەجۆرێک کە یەکێک لە یاریدەدەرەکانی ئارتێتا، گابی هاینزی یاریزانی پێشووی ئەرجەنتینی، بەراوردی کرد بە یەکێک لە ئەستێرە گەورەکانی هەموو سەردەمێک و دەڵێت:
تواناکانی ئەم کوڕە تایبەتە، لە دوای مێسیەوە هیچ کەسێکی لەم جۆرەم نەبینیوە.
ماکس تەمەنی 15 ساڵە، بەڵام جێگەی خۆی لە تیپی یەکەمی ئارسیناڵدا کردووەتەوە. یاریزانێکی تایبەت و بەتوانا کە بێ گومان لە ئایندەیەکی نزیکدا دەبێتە ئەستێرەیەکی دیاری تۆپی پێ و ئەمڕۆ لە گرنگترین یارییەکانی خولدا بەرامبەر لیڤەرپوول یاریی دەکات.
