یاریگا –
قۆناخی یەکەمی خولی نایابی کوردستان کۆتایی هات و تۆمار کردنی گۆڵ رێژەیەکی باشی بەخۆیەوە بینیوە.
لە کۆی 15 گەڕی رابردووی خولی نایابی کوردستان 98 یاریی کراوە، لە تەواوی قۆناخەکەدا 253 گۆڵ تۆمار کراوە کە دەکاتە 2.5 گۆڵ بۆ هەر یارییەک، ئەمەش رێژەیەکی باشە لە گۆڵ تۆمار کردن، 102 گۆڵ لە گێمی یەکەم و 151 گۆڵیش لە گێمی دووەم تۆمار کراون کە گێمی راهێنەرانە، گەڕی یەکەمی خولەکە زۆرترین گۆڵی تێدا تۆمارکرا کە 24 گۆڵ بوو، گەڕی سێیەمیش کەمترین گۆڵی تێدا تۆمارکرا کە 11 گۆڵ بوو.
لە تەواوی قۆناخی یەکەم 465 کارتی زەرد و 28 کارتی سوور لەلایەن ناوبژیوانانەوە بەرزکراوەتەوە، رێژەی کارتە زەردەکان دەکاتە نزیکەی پێنج کارت بۆ هەر یارییەک، رێژەی کارتی سووریش دەکاتە 0.2 کارت بۆ هەر یارییەک، گەڕی 10ـەی خولەکە بە 43 کارتی زەرد و کارتێکی سوور زۆرترین کارتی تێدا بەکار هاتووە.
هەر یەک لە شێروانە و زاخۆ و دەربەندیخان زۆرترین گۆڵیان لە قۆناخی یەکەم تۆمار کردووە کە 26 گۆلە، سەید سادق بە تۆمارکردنی حەفت گۆڵ کەمترین گۆڵی تۆمار کردووە، بە گۆڕینی پێنج راهێنەر سەید سادق تاکە یانەیە زۆرترین راهێنەری لە قۆناخی یەکەم گۆڕیوە و تاکە یانەی خولەکەشە هیچ سەرکەوتنێکی بە دەست نەهێناوە.
شێروانەی خاوەن ریزبەندی یەکەم زۆرترین سەرکەوتنی لە قۆناخی یەکەمی خولی نایابی کوردستان بە دەستهێناوە کە 9 سەرکەوتنە، چوارقوڕنە بە نۆ یەکسان بوون زۆرترین یەکسان بوونی بە دەستهێناوە و سەیدسادقیش بە نۆ شکست زۆرترین شکستی هەیە.
فەرحان شکور هێرشبەری دەربەندیخان بە تۆمارکردنی 14 گۆڵ گۆڵکاری قۆناخی یەکەمی خولەکە بوو، محەمەد خەلیلیش بە 9 گۆڵ لە ریزبەندی دووەمی گۆڵکاراندایە، هەر یەک لە بیلال نەعنوس یاریزانی پیشەسازی و میران محەمەد یاریزانی دەربەندیخان بە پێنج ئەسیست زۆرترین ئەسیستیان کردووە لە خولەکە.
رەوەند عەجیل گۆڵپارێزی هەولێر بە پێنج کلین شیت زۆرترین کلین شیتی کردووە لە قۆناخی یەکەم، گەیلان سادق لە هەندرێن و سەرکار سەردار لە رزگاری لە ریزبەندی دووەم و سێیەم دێن کە چوار کلین شیتیان هەیە.
لە تەواوی قۆناخی یەکەمی خولی نایابی کوردستان لە کۆی 98 یاریی 29 لێدانی سزا هەژمار کراوە، 26 لێدان کراون بە گۆڵ و سێ لێدانیش لە دەست دراوە.
