بەکارهێنانی سیستەمی ڤار لە یارییەکانی خولی ئەستێرەکانی عێراق بەردەوام دەبێت

یاریگا –

کێشە داراییەکانی کۆمپانیای جێبەجێکار چارەسەرکران و جێبەجێکردنی سیستەمی ڤار لە خولی ئەستێرەکانی عێراق بەردەوام دەبێت.

کۆمپانیای عەشتار کە مافی بەرهەمهێنان و گواستنەوەی یارییەکانی خولی ئەستێرەکانی عێراقی هەیە، لە راگەیاندراوێکیدا بڵاویکردووەتەوە :’کێشەی شایستە داراییەکانی جێبەجێکردنی سیستەمی ڤار چارەسەرکرا و لە سەرجەم یارییەکانی خولی ئەستێرەکانی عێراق ڤار بەکار دەهێنرێت، ٪100 لە تەواوی یارییەکانی خولەکە ڤار بەکار دەهێنرێت و لە یاریی ئەمڕۆش جێبەجێ دەکرێت’.

کۆمپانیاکە راشیگەیاندووە :’بەهۆی دواکەوتنی بودجەی کارپێکردنی فیدراسیۆنی تۆپی پێی عێراق، کێشە بۆ نوێکردنەوەی مۆڵەتی ساڵانەی سێرڤەرەکانی سیستەمی ڤار دروستببوو، دوای ئەوەی عەدنان درجال سەرۆکی فیدراسیۆنی تۆپی پێی عێراق هاتە سەر هێڵ، کێشەکان چارەسەرکران’.

ئەم وەرزە بۆیەکەمجار لە مێژوودا سیستەمی ڤار لە یارییەکانی عێراق جێبەجێ دەکرێت، بەڵام لە گەڕێ هەشتەم هەفتەی رابردوو لەکۆی هەشت یاری لە دوو یاریی سیستەمی ڤار جێبەجێ نەکران و گومان دەکرا لە یارییەکانی گەڕی نۆیەم ڤار هەبێت.