ریال مەدرید داوایەکی سەیر لە دراوسێیەکانی سانتیاگۆ بێرنابیۆ دەکات

یاریگا –

ریال مەدرید داوایەکی سەیر و سەمەرەی لە دراوسێکانی یاریگای سانتیاگۆ بێرنابیۆ کرد، کە بەرامبەر بە ژاوەژاوی کۆنسێرتەکانی ناو یاریگاکە ناڕەزایەتیان دەربڕیبوو.

ریال مەدرید ناچار بوو بەهۆی گلەیی دراوسێکانی لەسەر دەنگی بەرزی کۆنسێرتەکان خشتەی کۆنسێرتەکانی لە سانتیاگۆ بێرنابیۆ رابگرێت. کۆنسێرتەکان کە ئەستێرەکانی وەک تایلۆر سویفت و کارۆل جیان هێنایە یاریگاکە، لانیکەم تا مانگی ئازار بەهۆی ژاوەژاو بۆ دانیشتوانی باڵەخانەکانی نزیک یاریگاکە هەڵوەشاونەتەوە.

بەمەبەستی چارەسەرکردنی ئەم کێشەیە ریال مەدرید لەگەڵ کەسانی پسپۆڕی جۆراوجۆر کاردەکات بۆ دۆزینەوەی رێگاکانی کەمکردنەوەی دەنگەکان. یەکێک لە پێشنیارەکانی ئەم یانەیە بەلای دراوسێکانەوە نائاسایی دەردەکەوێت. بەگوێرەی رامۆن ئەلڤارێز دامۆن، پەیامنێری ئیسپانی نزیک لە یانەکە، یانە مەدریدییەکە پەیوەندی بە بەشێک لە دراوسێکانیەوە کردووە و پێشنیاری کردووە کە لە باڵەخانەکانیاندا سیستەمی دژە دەنگ دابنێن بۆ ئەوەی کێشەی دەنگەکە چارەسەر بکرێت و بتوانن جارێکی دیکە کۆنسێرت سازبکەنەوە.

🚨 El Real Madrid ha hecho una oferta a los vecinos de Rafael Salgado y Concha Espina que consiste en insonorizar sus casas. La oferta ya ha sido rechazada por dos de las comunidades de vecinos involucradas. El resto de las comunidades aún no han contestado. No es el ruido lo que… pic.twitter.com/hyisheyfpX

— Ramón Álvarez de Mon (@Ramon_AlvarezMM) October 5, 2024

بەڵام دوو باڵەخانەی دراوسێ کە پێشنیارەکەیان پیگەیشتووە، بە توندی رەتیان کردووەتەوە. ماوەتەوە بزانین دراوسێکانی تر چۆن وەڵامی ئەم پێشنیازە دەدەنەوە و ئایا ریال مەدرید دەتوانێت چارەسەرێک بۆ ئەم کێشەیە بدۆزێتەوە.