ریال مەدرید پاڵەوانێکی یۆرۆ دەکاتە ئامانج
مێرێنگی پێویستی بە دڵی بەرگرییە
یاریگا –
لەسەر داوای کارلۆ ئانچێلۆتی، ریال مەدرید هەوڵەکانی بۆ گواستنەوەی بەرگریکارێک چڕکردووەتەوە.
پاش ئەوەی ناچۆ فێرناندێز بەفەرمی ریال مەدریدی جێهێشت، یانەکە لە گواستنەوەی لێنی یۆرۆش سەرکەوتوو نەبوو، ئێستا بۆ وەرزی نوێ تیپەکە تەنیا سێ یاریزانی دڵی بەرگری هەیە، ئەوانیش ئێدێر میلیتاو، ئانتۆنی رودیگەر و دەیڤد ئالابان، بەڵام بەرگریکارە نەمساییەکە هێشتا لە دوایین پێکانی چاکنەبووەتەوە.
دوو رۆژ لەمەوبەر ناوی ماتس هەمڵسی ئەڵمانی بە ریال مەدرید بەسترایەوە، بەرگریکارە ئەڵمانییەکە ئێستا یاریزانێکی ئازادە، بۆڵۆنیای ئیتاڵیش هەوڵەکانی بۆ گواستنەوەی چڕکردووەتەوە، بەڵام ماتس تا ئێستا خۆی یەکلا نەکردووەتەوە.
لە پێشهاتێکی نوێ رۆژنامەی موندۆ دیپۆرتیڤۆ بڵاویکردووەتەوە، ئێمریک لاپۆرتی ئیسپانی و بەرگریکاری یانەی نەسڕی سعودی ئامانجێکی دیکەی ریال مەدریدە، کارلۆ ئانچێلۆتی بە تواناکانی سەرسامە و دەیەوێت گرێبەستی لەگەڵدا واژۆ بکەن.
🧐 El Real Madrid sigue en busca de un central después de quedarse sin Yoro, flamante fichaje del United
✍️ @jlartus https://t.co/PDu65N4MLA
— Mundo Deportivo (@mundodeportivo) July 25, 2024
بەگوێرەی زانیارییەکانی رۆژنامە ئیسپانییەکە، لاپۆرت ئامادەیە پەیوەندی بە ریال مەدرید بکات، لە ئەگەری هەڵوەشاندنەوەی گرێبەستەکەی و جێهێشتنی نەسڕ دەستبەرداری 48 ملیۆن یۆرۆ دەبێت، کە بە دوو وەرزی وەری دەگرێت.
بەڵام نەسڕ نایەوێت بەخۆڕایی یاریزانەکە لەدەستبدات، دەیەوێت 27 ملیۆن یۆرۆ لە ریال مەدرید وەربگرێت، ئەوەش هەمان ئەو نرخەیە، کە لە هاوینی 2023 یاریزانەکەیان لە مانچێستەر سیتییەوە پێ گواستەوە، بەڵام مەدریدییەکان تەنیا بە خۆڕایی یاریزانەکەیان دەوێت و ئامادە نین ئەو پارەیە لە گواستنەوەی خەرج بکەن.
لاپۆرت یاری بۆ ئاتلێتیک بلباو، مانچێستەر سیتی و نەسڕ کردووە، لە 449 یاری 26 گۆڵ و 12 ئەسیستی کردووە. لە 35 یاریش گۆڵێکی بۆ هەڵبژاردەی ئیسپانیا کردووە. لەم هاوینەش نازناوی جامی یۆرۆی لەگەڵ ماتادۆر بەدەستهێنا.
