یاریگا –
هەڵبژاردەی تۆپی پێ فەڵەستین لە پاڵەوانیەتییەک کشایەوە.
بەهۆی شەڕی بەردەوامی نێوان بزووتنەوەی حەماس و ئیسرائیل، یەکێتیی تۆپی پێی فەڵەستین رایگەیاند، بڕیاربوو پاڵەوانیەتییەک لە مالیزیا بە بەشداری هەڵبژاردەکەیان بەڕێوەبچێت، بەڵام کشانەوە.
گرژییەکانی نێوان بزووتنەوەی حەماس و ئیسرائیل پەرەی سەندووە. میدیاکانی ئیسرائیل بڵاویانکردووەتەوە، تاوەکو ئێستا زیاتر لە 900 ئیسرائیلی کوژراون و زیاتر لە 2600 کەسی دیکەش بریندار بوون.
لەلایەکی دیکەوە، تەندروستی فەڵەستین روونیکردووەتەوە، لانی کەم 687 کەس بەهۆی بۆردومانی سوپای ئیسرائیل لە غەزە کوژراون.
ئەمە لە کاتێکدایە، یەکێتیی تۆپی پێی ئەوروپا، تەواوی یارییەکان لە ئیسرائیل بۆ کاتێکی نادیار دواخست.
بڕیاربوو لە پاڵاوتنەکانی یۆرۆی 2024 ئیسرائیل لە تەلئەڤیڤ میوانداری هەڵبژاردەی سویسرا بکات، بەڵام یارییە لەلایەن یەکێتیی تۆپی پێی ئیسرائیل دواخرا.
یوێفا روونیکردووەتەوە، لە نزیکەوە چاودێری دۆخەکە دەکات و بەردەوام لەگەڵ بەرپرسانی یەکێتیی تۆپی پێی ئیسرائیل لە پەیوەندیدا دەبێت.
ماکابی حەیفا، پاڵەوانی وەرزی رابردووی پرێمەرلیگی ئیسرائیل بەشداری لە یۆرۆپالیگی ئەم وەرزە کردووە و بڕیارە لە دوای یارییەکانی نێودەوڵەتی، لە ئیسپانیا رووبەڕووی ڤیاڕیال ببێتەوە.
