فیفا بۆ ماوەیەک رۆبیالێسی سڕ کرد

یاریگا –

بە پێی راگەیاندنی فیفا، سەرۆکی فیدراسیۆنی تۆپی پێی ئیسپانیا لویس رۆبالێسی بۆ ماوەی 90 رۆژ لە هەموو چالاکییەکانی تۆپی پێ قەدەغە کرا.

بە پێی دەنگۆیەکان کە وا بیردەکرایەوە لویس روبیالێس سەرۆکی یەکێتی تۆپی پێی ئیسپانیا دەست لە پۆستەکەی بکێشێتەوە بەهۆی هەڵسوکەوتە نەشیاوەکەی لە کۆتایی یاری کۆتایی جامی جیهانی ئافرەتان، بەڵام دوێنێ لە کۆنگرەیەکی رۆژنامەوانیدا رایگەیاند کە هیچ بڕیاری دەستلەکارکێشانەوەی نییە و هەر لەبەر ئەم هۆکارەش فیفا بە شێوەیەکی تایبەتی هەنگاوی ناوە بۆ سڕ کردنی.

لە ئاگادارییەکدا کە ماڵپەڕی فەرمیی فیفا بڵاویکردووەتەوە، لیژنەی ئەخلاقی فیفا بە کەڵک وەرگرتن لەو دەسەڵاتانەی لە مادەی 51ی یاسای ئەخلاقی فیفادا دراوە، بڕیاریدا بەشێوەیەکی کاتی لویس روبیالێس لە سەرجەم چالاکییەکانی پەیوەست بە تۆپی پێ لەسەر ئاستی نیشتمانی و نێودەوڵەتی لە ئیسپانیا رابگیرێت.

لە بڕیارەکەدا هاتووە، راگرتنەکە لە ئەمڕۆە کاری پێدەکرێت، بۆ ماوەی سەرەتایی 90 رۆژە تاوەکو دانیشتنی لێژنەی ئەخلاقی فیفا لە دژی لویس روبیالێس لە رۆژی پێنجشەممە 24ی ئابدا ئەنجام بدرێت.

هەروەها لە پێناو پاراستنی مافە بنەڕەتییەکانی یاریزانی هەڵبژاردەی تۆپی پێی ئیسپانیا جێنیفر هێرمۆسۆ، سەرۆکی لیژنەی ئەخلاقی فیفا دوو رێنمایی زیادەی دەرکردووە، کە بەهۆیەوە ئەو فەرمان بە لویس روبیالیس دەکات کە ئەو یان لایەنی سێیەم لە پەیوەندیکردن یان هەوڵدان بۆ پەیوەندیکردن بە یاریزانی هەڵبژاردەی نیشتمانی ئیسپانیا جێنیفر هێرمۆسۆ یان هەر هەوڵێک بۆ نزیکبوونەوە لێی دوور بکەوێتەوە.

لە بەشی کۆتایی ئەم بەیاننامەیەدا هاتووە: “فیفا پابەندبوونی رەهای خۆی بۆ ڕێزگرتن لە هەموو تاکەکان دووپات دەکاتەوە و هەر بۆیەش بە توندی ئیدانەی هەر رەفتارێک دەکات کە دژی ئەخلاق ئەنجام بدرێت.