بێرناردۆ سیلڤا لە بارسێلۆنا بێهیوا بووە

یاریگا –

بێرناردۆ سیلڤای پۆرتوگالی بێهیوا بووە لە پەیوەندیکردن بە یانەی بارسێلۆنای ئیسپانی.

رۆژنامەی سپۆرت بڵاویکردووەتەوە، بێرناردۆ سیلڤا، ئەستێرەی مانچێستەر سیتی خەون بە یاریکردن بۆ بارسێلۆنا دەبینێت، بەڵام پاڵەوانی لالیگا تاوەکو ئێستا بە هۆی کێشەی داراییەوە ناتوانێت هیچ هەنگاوێک بنێت.

زیاتر لە ساڵێکە ئەستێرە پۆرتوگالییەکەی بلوو موون ئارەزووی یاریکردن بۆ یانە کەتەلۆنییەکە دەکات، بەڵام پێدەچێت وەرزی داهاتوو لە ئینگڵتەڕا بمێنێتەوە.

هۆکاری ئارەزووی رۆیشتنی سیلڤا لە مانچێستەر سیتی بۆ ئەوە ناگەڕێتەوە پەیوەندییەکی خراپی لەگەڵ یانەکە یاخود پێپ گواردیۆلای راهێنەر هەبێت، بەڵکو یاریکردن بۆ بارسا خەونێکی گەورەی یاریزانە تەمەن 28 ساڵانییەکەیە.

بەپێی رۆژنامە کەتەلۆنییەکە، بارسێلۆنا تا رادەیەک بێهیوا بووە لە بەدەستهێنانی بێرناردۆ سیلڤا، بەهۆی خراپی دۆخی دارایی یانەکە گواستنەوەی ناوبراو لەم مێرکاتۆیە مەحاڵە.

خۆرخی مێندێز، بریکاری یاریزانەکە لەم مێرکاتۆیە چەند جارێک یاریزانەکەی پێشکەش بە بارسا کردووە، یانەکەش ئامادەیی خۆی نیشانداوە بۆ گواستنەوەی، بەڵام خراپی دۆخی دارایی بارسا ئەگەری روودانی ئەو گواستنەوەیەی کردووە بە مەحاڵ، مەگەر خوان لاپۆرتا جادوویەک بکات بۆ گۆڕینی دۆخەکە.

هاوکات چەند یانەیەکی سعودی و یانەی پاریس سانجێرمانی فەڕەنسیش چاویان لە گواستنەوەی یاریزانەکەیە، بەڵام رەنگە ناوبراو تەنیا لە پێناو بارسێلۆنا پێپ گواردیۆلا جێبهێڵێت.

بێرناردۆ لە هاوینی 2017 لە مۆناکۆی فەڕەنسییەوە بە بڕی 50 ملیۆن یۆرۆ گواسترایەوە بۆ سیتیزن، بە درێسی یانەکە 306 یاری کردووە، 55 گۆڵی کردووە و 59 گۆڵیشی درووست کردووە.

نازناوێکی چامپیۆنزلیگ، 5 نازناوی پرێمەرلیگ، 4 نازناوی کاراباو کەپ، 2 نازناوی جامی یەکێتی ئینگڵتەڕا و 2 نازناوی جامی قەڵغانی ئینگڵتەڕای لەگەڵ یانە ئینگلیزییەکە بەدەستهێناوە.