یاریگا –
بۆڕووسیا دۆرتموند، گەیشتن بە رێککەوتن لەگەڵ ریال مەدرید، لەبارەی گواستنەوەی جود بێڵینگهام رەتدەکاتەوە.
سێباستیان کێل، بەڕێوەبەری وەرزشی بۆڕووسیا دۆرتموند، تەواوی ئەو دەنگۆیانەی رەتکردووەتەوە کە باس لە گواستنەوەی بێڵینگهام، ئەستێرەی ئینگلیزی بۆ ریال مەدرید دەکەن.
گرێبەستی یاریزانی 19 ساڵان لە هاوینی ساڵی 2025 لەگەڵ دۆرتموند بەسەر دەچێت، دەنگۆکان باس لە نزیکبوونەوەی جود لەگەڵ لۆس بلانکۆس دەکەن، بەڵام سێباستیان کێڵ رەتیکردەوە هیچ جۆرە رێککەوتنێک هەبێت، کێڵ لە لێدوانێکیدا لەگەڵ بەرنامەی Sky90 روونیکردەوە
هەموو کارێک بۆ پارێزگاریکردن لە بێڵینگهام دەکەین، چونکە ئێمە یانەیەکین دەمانەوێت پارێزگاری لە باشترینەکان بکەین. تاوەکو ئێستا هیچ بڕیارێک لەبارەی بێڵینگهام نەدراوە. هیچ بابەتێکیش گفتوگۆی لەسەر نەکراوە، تەنانەت هیچ هەواڵێکیش نەبووە. بێڵینگهام بە تەواوی سەرنجی لەسەر یانەکەی داناوە و لە هەفتەکانی دواتر، بڕیار لەسەر گەشەسەندنەکان دەدەین.
Kehl: Wettbieten um Bellingham wird «an Fahrt aufnehmen» https://t.co/tj6AHj9qYe
— sportexpress.io (@sportexpress_io) May 15, 2023
سێباستیان کێل، لە بابەتەکەی بێڵینگهام زۆر نیگەرانە و دەڵێت
دەزانم ئەم بابەتانە چۆن باس دەکرێن، جود بێڵینگهام هیچ مەرجێکی بۆ جێهێشتنی یانەکە نییە، چونکە هێشتا دوو ساڵ لە گرێبەستەکەی ماوە و هیچ وادەیەکمان بۆ دوا بڕیار دانەناوە. من لە پێناو ئەم یانەیە دەجەنگم و باشترین یاریزان لە پێکهاتەکەمان یاری دەکەن، بێڵینگهام یەکێکە لەوان.
لە ماوەی رابردوودا، چەندین رۆژنامەی گەورەی ئەوروپا باسیان لە گواستنەوەی بێڵینگهام بە بڕی 150 ملیۆن یۆرۆ بۆ ریال مەدرید کرد.
بێڵینگهام لە هاوینی ساڵی 2020 لە یانەی بیرمینگهامەوە بە بڕی 25 ملیۆن یۆرۆ، پەیوەندی بە دۆرتموندەوە کرد.
ئەستێرە ئینگلیزییەکە لەم وەرزەدا بەشداری لە 42 یاریدا کردووە و 14 گۆڵی کردووە و حەوت گۆڵیشی دروست کردووە.
