مانچێستەر یونایتد چەکێکی شاراوە بۆ گواستنەوەی بێڵینگهام بەکاردەهێنێت

یاریگا –

مانچێتسەر یونایتد چەکێکی نهێنی بۆ گواستنەوەی جود بێڵینگهام، ئەستێرەی بۆڕووسیا دۆرتموند ئامادە کردووە.

رۆژنامەی زە سەن بڵاویکردووەتەوە، دۆرتموند ئامادەیە بە بڕی 130 ملیۆن پاوەند رێگە بە چوونەدەرەوەی بێڵینگهام بدات، ئەمەش بووەتە جێگەی مشتومڕی یانەکانی مانچێستەر یونایتد، ریال مەدرید و لیڤەرپوول.

رۆژنامەکە بڵاویکردووەتەوە، کریس هارگریڤز، بەڕێوەبەری تۆپی پێی مانچێستەر یونایتد پەیوەندییەکی نزیکی لەگەڵ بێڵینگهام هەیە، ئەمەش لە بەرژەوەندی شەیتانە سوورەکاندایە.

هارگریڤز پێشتر بەڕێوەبەری جێبەجێکاری کۆمپانیای ئادیداس بوو و مانگی رابردوو، پۆستە نوێیەکەی لە مانچێستەر یونایتد وەرگرت.

بڕیارە بۆ گواستنەوەکانی بازاڕی هاوینەی یاریزانان، هارگریڤز راستەوخۆ ئاوێتەی گفتوگۆکان بێت و ببێتە هۆکارێک بۆ رازیکردنی ئەستێرە ئینگلیزییەکە.

مانچێستەر هیوایەکی زۆری بە هارگریڤزە بۆ ئەوەی گرێبەستی بێڵینگهام یەکلایی بکاتەوە، کە سێ ساڵە یاری بۆ زەردەواڵەکانی ئەڵمانیا دەکات.

کێبڕکێی نێوان ریال مەدرید و مانچێستەر یونایتد لەسەر بێڵینگهام گەیشتووەتە لووتکە، ئەمەش دوای نیمچە کشانەوەی لیڤەرپوول لە کەیسەکە، بەهۆی بەرزی نرخەکەیەوە.

گرێبەستی بێڵینگهام لە هاوینی ساڵی 2026 لەگەڵ دۆرتموند بەسەر دەچێت و هیچ فشارێک لەسەر یانە زەردپۆشەکان نییە، بە نرخێکی کەم دەستبەرداری بێڵینگهام ببێت.

لەم وەرزەدا، بێڵینگهام بەشداری لە 39 یاریدا کردووە. 11 گۆڵی کردووە و 7 گۆڵی دیکەشی دروستکردووە.