مەرجێکی گرێبەستەکەی هالاند هیوای بە ریال مەدرید بەخشیوە

یاریگا –

یانەی ریال مەدرید پلانی بۆ گواستنەوەی ئێرلینگ هالاندی نەرویجی داناوە.

ئاشکرایە کە ریال مەدرید سەرسامە بە هالاند، بەتایبەت پاش پێشکەشکردنی وەرزێکی سەرسووڕهێنەر بە درێسی یانەی مانچێستەر سیتی ئینگلیزی.

رۆژنامەی سپۆرت بڵاویکردووەتەوە، کە ریال مەدرید پلانی داناوە بۆ گواستنەوەی هێرشبەرە نەرویجییەکە لە هاوینی ساڵی 2024.

بەپێی هەمان سەرچاوە پێشبینی دەکرێت تێچووی ئەم گرێبەستە بگاتە 222 ملیۆن یۆرۆ، بەڵام مێرێنگی ئەمە بەزۆر نازانێت بۆ گۆڵکارە نەرویجییەکە و پێیوایە نرخێکی تەواو شایستەیە.

سەرجەم بۆچوونەکان کۆکن لەسەر ئەوەی مانچێستەر سیتی لەم هاوینە رێگری لە هەر هەوڵێک دەکات بۆ رۆیشتنی هالاند لە ئیتیحاد.

بەڵام هەوڵەکانی سیتیزن درێژە ناخایەنێت بەوپێیەی لە هاوینی ساڵی 2024 یاریزانەکە ئازاد دەبێت لە بڕیاردان بە مانەوە یان رۆیشتن، ئەویش بەهۆی کارابوونی مەرجێکی گرێبەستەکەی.

کارابوونی ئەو مەرجەی گرێبەستەکە هیوایەکی زۆری بە ریال مەدرید بەخشیووە تا لە ساڵی 2024 خەونە گەورەکەی بەدیبهێنێت و هالاند بکات بە یاریزانی ژمارە 9ـی.

بەپێی میدیاکانی ئیسپانیا مەدرید گرێبەستی کەریم بێنزێما تا ساڵی 2024 نوێدەکاتەوە، بەڵام پاش ئەو ساڵە بێنزێما پێگەی لەق دەبێت، هالاند لەسەر تەختەی پاشاییەکەی گۆڵکارە فەڕەنسییەکە دادەنیشێت.