بایرن میونشن یاریزانێکی دیکە دەگوازێتەوە

یاریگا–
یانەی بایرن میونشنی ئەڵمانیا لە پێناو زیاتر بەهێز کردنی ریزەکانی یانەکەیان، دەیانەوێت مارسێل سابیتزەر هێرشبەری یانەی لایپزیگ بۆ ریزەکانیان بگوازنەوە.

رۆژنامەی وەرزشی بیڵدی ئەڵمانیا زانیاری دەستکەوتووە، باڤارییەکان دەمێکە گفتوگۆکانیان لەگەڵ یانەی لایپزیگ دەست پێکردووە بە مەبەستی گواستنەوەی هێرشبەری نەمسایی ئەو یانەیە و دەنگۆیەکیش هەیە کە هەردوولا بەرامبەر 16 ملیۆن یۆرۆ لەسەر ئەم گواستنەوەیە رێکەوتوون و چاوەڕێش دەکرێت پێشکۆتایی هاتنی وادەی گواستنەوەی ئەم هاوینە، ئەم یاریزانە درێسی باڤارییەکان لەبەر بکات.

سابیتزەر تەمەن 27 ساڵ لەوەتەی ساڵی 2014 لە ریزەکانی یانەی لایپزیگ یاری دەکات، ئەو یاریزانە وەرزی رابردوو لەسەرجەم خوڵ و پاڵەوانتیەکان لەگەڵ یانەکەی بەشداری 39 یاری کرد و تەنها نۆ گۆڵی تۆمار کرد، هەروەها ئەم وەرزە لە دوو یاری بۆندزلیگا هیچ گۆڵێکی نەکردووە.