داهاتووی یەکلایی دەکاتەوە؛ بژاردەکانی نێیمار چین؟

یاریگا –

ئەگەرچی بیر لە گواستنەوەی نێیمار بۆ خولی ئەمریکی کرابووەوە، بەڵام دانوستانەکان بۆ پەیوەندیکردنی بە یانەی سینسیناتی سەرکەوتوو نەبوون.

دوای کرانەدەرەوەی بە ئازاری بەڕازیل لە مۆندیالی 2026، داهاتووی نێیمار دا سیلڤا کەوتووەتە دۆخێکی نادیارەوە. لەم نێوەندەدا سێ بژاردە بۆ داهاتووی ئەو باسیان لێوە دەکرا کە بریتیبوون لە وازهێنانی یەکجاری لە یاریکردن بەهۆی ماندووبوونی لە شکستەکان، رەخنەکان و پێکانە بەردەوامەکان؛ یان پەیوەندیکردن بە یانەیەکی خولی ئەمریکی؛ یاخود گەڕانەوە بۆ یانەی سانتۆس و تەواوکردنی گرێبەستەکەی.

ماڵاوایی نێیمار لە تیمی نیشتمانی

سەبارەت بە کاروانی نێودەوڵەتی، پێدەچێت بژاردەی یەکەم پشتڕاستکرابێتەوە و نێیمار تیمی نیشتمانیی بەڕازیل جێدەهێڵێت. ئەم بڕیارە گەڕانەوەی بۆ نییە، چونکە نە یاریزانەکە و نە کارلۆ ئانچێلۆتیی راهێنەریش پلانیان نییە لە داهاتوودا ئەو بەشێک بێت لە پێکهاتەی تیمی نیشتمانی.

بەڵام لە چەند رۆژی رابردوودا، ئەگەری بەردەوامبوونی لەسەر ئاستی یانەکان بەهێزتر بووە. لەنێو خێزانەکەیدا هاوڕاییەک هەیە کە نێیمار نابێت بەم شێوازە نەرێنییە کۆتایی بە کاروانی وەرزشیی خۆی بهێنێت. لە پۆستێکی ئەم دواییەی تۆڕی کۆمەڵایەتیی ئینستاگرامدا، باوکی نێیمار هانیداوە کە کۆڵ نەدات و گوتوویەتی هێشتا هەموو شتێک لەدەست نەچووە و پێویستە بەردەوام بێت لە چێژوەرگرتن لە تۆپی پێ. جگە لەوەش، وازهێنانی یەکجاری ئێستا لە رووی بازرگانییەوە گونجاو نییە، چونکە گرێبەستە سپۆنسەرییەکان و پابەندبوونی کارەکانی بۆ ئێستا وازهێنانی دەستبەجێی پێ ئەستەم دەکەن.

بژاردەی خولی ئەمریکی ئێستا لادراوە

سەبارەت بە ئەگەری یاریکردن لە خولی ئەمریکیدا، دانوستانەکان بۆ گواستنەوەی بۆ یانەی سینسیناتی پێش نەکەوتوون. دوای چەندین مانگ لە گفتوگۆ و سەرەڕای گەشتی کریس ئالبڕایت بەڕێوەبەری وەرزشی و جێف بێردینگی سەرۆکی یانەکە بۆ بەڕازیل لە مانگی نیساندا بۆ بینینی نێیمار و باوکی، لە کۆتاییدا یانە ئەمریکییەکە هیچ ئۆفەرێکی فەرمیی پێشکەش نەکرد.

گەڕانەوە بۆ سانتۆس پشتڕاستکرایەوە

ئێستا بژاردەی کۆتایی لە هەموویان زیاتر چاوەڕوانکراوە. بەگوێرەی رۆژنامەی موندۆ دیپۆرتیڤۆ، نێیمار بڕیاریداوە تاوەکوو مانگی کانوونی یەکەم پابەند بێت بە گرێبەستەکەی لەگەڵ یانە بەڕازیلییەکەدا. سەرچاوەکە ئاماژە بەوە دەکەن کە نێیمار بە هاوڕێکانی گوتووە، ناتوانێت لەم کاتەدا سانتۆس یان هاوتیمەکانی بەجێبهێڵێت، چونکە یانەکە بە قەیرانێکی دارایی قورسدا تێدەپەڕێت، سزای قەدەخەکردنی تۆمارکردنی یاریزانی نوێی لەسەرە و زۆر نزیکە لە ناوچەی دابەزین لە خولی بەڕازیلیدا.

هاوكات هۆکاری خێزانیش رۆڵ دەبینن لەم بڕیارەدا. برونا بیانکاردیی هاوژینی چاوەڕوانی منداڵێکی دیکە دەکات و نێیمار دەیەوێت لە ماوەی دووگیانیەکەیدا لە تەنیشتی بێت لە ماڵە خێزانییەکەیاندا لە کەناراوەکانی ساوپاولۆ.

لە کۆتاییدا، بە گوتەی لوکاس مۆسێتیی رۆژنامەنووسی مێدیای UOL، چاوەڕوان دەکرێت نێیمار رۆژی هەینی 17ـی تەممووز بگەڕێتەوە سانتۆس بۆ ئەنجامدانی پشکنینە پزیشکییە ئاساییەکانی. پشکنینەکە بەتایبەتی تیشک دەخاتە سەر ماسوولکەی گۆزەنگ، هاوسەنگیی ماسولکەیی، دۆخی ئەژنۆی و تاقیکردنەوەی دڵ. بەهۆی ئەوەی ئەم هێرشبەرە پشوویەکی ئاسایی وەرنەگرتبوو، چونکە بە تایبەتی بۆ مۆندیال راهێنانی دەکرد، پێش گەڕانەوەی تەواوەتی بۆ راهێنانە بەکۆمەڵەکان، قۆناخێکی راهاتن و گواستنەوەی جەستەیی بۆ دادەنرێت.