بە تەواوی گونجاوە؛ ئەگوێرۆ پشتگیری لە بڕیارەکەی ئالڤارێز بۆ جێهێشتنی ئاتلێتیکۆ دەکات

یاریگا –

ئەگوێرۆ پشتگیری لە بڕیارەکەی ئالڤارێز دەکات بۆ جێهێشتنی ئاتلێتیکۆ مەدرید و پەیوەندیکردن بە بلاوگراناوە.

ئەگەر تەنیا یەک کەس هەبێت کە بزانێت یاریکردن بۆ تیمی نیشتمانیی ئەرجەنتین، مانچێستەر سیتی، ئاتلێتیکۆ مەدرید و بارسێلۆنا چۆنە، ئەو کەسە سێرجیۆ ئەگوێرۆیە. “کون” پێش وازهێنانی لە یاریکردن، لە کاروانی وەرزشی خۆیدا بۆ سەرجەم ئەو تیمانە یاریی کردووە.

ئێستا، پێدەچێت خولیان ئالڤارێز شوێنپێی ئەو هەڵبگرێت و دوای یاریکردنی لە مەدرید و مانچێستەر، پەیوەندی بە بارساوە بکات. هێرشبەرە ئەرجەنتینییەکە لە کاتی یاریکردنی لەگەڵ ئەرجەنتین لە مۆندیالدا ئارەزووی خۆی بە روونی نیشاندا، ئەگەرچی وا دیارە ئاتلێتیکۆ حەزی بە گفتوگۆکردن نییە.

ئەگوێرۆ ئامادە بوو رای خۆی لەسەر ئەم گواستنەوە پێشنیارکراوە دەرببڕێت و گوتی:

خولیان لەگەڵ زۆر یانەدا دەگونجێت، بەڵام بەهۆی شێوازی یاریکردنیەوە، بە شێوازێکی زۆر سەرنجڕاکێش لەگەڵ بارسا دەگونجێت. ئەو یاریزانێکی ئاستی باڵایە، کەسێکە کە دەتوانێت لە هەر شوێنێک بێت یاری بکات و مەترسییەکی هێرشبەریی هەمەلایەنەیە. زۆر نایابە یاریزانی وەکوو ئەوت لەبەردەستدا بێت. ئەو یاریزانێکی هێرشبەرە؛ باڵ، هێرشبەر، ناوەڕاستی هێرشبەر… سەرمایەیەکی فرەچەشنە؛ دەتوانیت بەکاری بهێنیت کاتێک یاریزانانی دیکە تووشی پێکان دەبن.

ئەگوێرۆ هاوکات پشتگیری لە بڕیارەکەی ئالڤارێز کرد بۆ ئاشکراکردنی ئارەزووی جێهێشتنی یانەکە و گوتی:

یاریزانەکە هیچ بژاردەیەکی دیکەی لەبەردەمدا نییە جگە لەوەی راستگۆ و سەرڕاست بێت. ئەو دەڵێت لەگەڵ یانەکەدا کۆبووەتەوە و ئەوان رازی بوون کە گواستنەوە باشترین رێڕەوی کارکردنە.

ئاتلێتیکۆ خێرا بوو لە راگەیاندنی ئەوەی کە هیچ گفتوگۆیەک بۆ فرۆشتنی قبووڵ ناکات، لەبڕی ئەوە ئاماژەی بە مەرجی هەڵوەشاندنەوەی گرێبەستەکەی کرد کە 500 ملیۆن یۆرۆیە، کە بەدیهێنانی بە تەواوی ئەستەمە. ئەگوێرۆ لەم بارەیەوە گوتی:

بەبوونی ئەو مەرجی هەڵوەشاندنەوەیە، بڕیارەکە لای یانەکەیە. یانەکە بڕیار دەدات کە ئایا بتفرۆشێت یان نا و ئەگەر ڕاستگۆ بم، ئەو لە کۆتاییدا راستییەکەی بە یانەکە گوت و ئەمەش باشترین شێوازی مامەڵەکردنە.

ئەگوێرۆ رایگەیاند کە هیچ یانەیەک نایەوێت دان بەوەدا بنێت کە ئامادەیە رێگە بە یاریزانێک بدات بڕوات و ئەمەش دەکرێت تەنیا نواندنێک بێت. ئەو رای کەسیی خۆی لەسەر ئەوەدا کە چی بکرێت کاتێک ئەستێرەیەکی تیمەکە دەیەوێت بڕوات و گوتی:

ئەگەر من یانەکە بووبام و یاریزانێک دڵخۆش نەبووایە، چ بەهۆی شارەکەوە بێت یان هەر هۆکارێکی دیکە، یان هەستی خراپی بەرامبەر هاوتیمەکانی، راهێنەر، یان کارگێڕیی هەبووایە… ئەگەر ئەو ئاسوودە نەبووایە، باشترین شت ئەوە دەبوو کە چارەسەرێک بدۆزرێتەوە و بفرۆشرێت. تۆ ناتوانیت یاریزانێکت بە درێژایی ساڵ لەدەوروبەر بێت کە خەمبار دیار بێت و وزەی خراپ بڵاو بکاتەوە. ئەگەر ئەو ئاسوودە نییە، یانەکە پێویستە یارمەتی بدات؛ تاوەکوو ئەو شوێنەی پەیوەندیدار بێت بە منەوە، کارەکان بەم شێوەیە بەڕێوە دەچن.