بەندێکی جێگیر هەیە؛ شلۆتێربێک لە ریال مەدریدەوە چاوەڕێی پەیوەندییەک دەکات

یاریگا –

بۆروسیا دۆرتمووند و یاریزانە نێودەوڵەتییە ئەڵمانییەکە لە مانگی نیساندا گەیشتنە رێککەوتن بۆ نوێکردنەوەی ئەو گرێبەستەی کە بڕیار بوو لە 30ـی حوزەیراندا کۆتایی بێت.

تەنیا لە ماوەی 10 رۆژدا، ریال مەدرید بەقەد تەواوی بازاڕی گواستنەوەی هاوینەی وەرزی رابردوو گرێبەستی لەگەڵ یاریزانان واژۆ کردووە. بەڵام، تەواوی ئەم چالاکییانە بەو مانایە نین کە یانەکە کۆتایی بە رێکخستنەوەی پێکهاتەکەی هێنابێت کە لە پشت پەردەکانەوە بەڕێوە دەچێت. بەگوێرەی رۆژنامەی ئاس، هێشتا چاوەڕێی گەیشتنی دوو یاخود سێ یاریزانی دیکە دەکرێت، لەپاڵ رۆیشتنی چەند یاریزانێکی دیکە بۆ ئەوەی بخرێنە سەر لیستی رۆشتووەکانی وەکوو دەیڤد ئالابا و دانی کارڤاخال.

یەکێک لەو پێگانەی ریال مەدرید هێشتا دەیەوێت بەهێزی بکات، دڵی بەرگرییە. سەرەڕای هاتنی ئیبراهیما کۆناتێ، یانەکە بەردەوامە لە گەڕان بەدوای بژاردەکاندا. لەگەڵ نزیکبوونەوەی یۆشکۆ ڤاردیۆل لە واژۆکردنی گرێبەستێکی نوێ لەگەڵ مانچێستەر سیتی، ناوی نیکۆ شلۆتێربێک جارێکی دیکە لە ڤالدێبێباس سەری هەڵداوەتەوە، لەپاڵ بەربژێرەکانی دیکەی وەکوو بەرگریکارە پۆرتۆگالییەکەی بێنفیکا، تۆماس ئاراوخۆ.

بەگوێرەی سەرچاوەکە، ئەم بەرگریکارە ئەڵمانییە لە تەواوی وەرزەکە لەژێر چاودێریی ریال مەدریدا ماوەتەوە. یەکێک لەو شتانەی سەرکردایەتیی مەدرید لێی دڵنیایە ئەوەیە کە ئەوان هەرگیز دەست نابەن بۆ پرۆسەیەکی دژوار لە بەرامبەر بۆروسیا دۆرتمووند. بەڵام، بوونی بەندی هەڵوەشاندنەوەی گرێبەست بە بەهای 50 ملیۆن یۆرۆ، دەرگا لەبەردەم ئەگەرێکی رێککەوتنێک دەکاتەوە.

نوێکردنەوەی گرێبەست

بۆروسیا دۆرتمووند و نیکۆ شلۆتێربێک لە ماوەی مانگی نیساندا گەیشتنە رێککەوتن بۆ درێژکردنەوەی ئەو گرێبەستەی کە بڕیار بوو لە 30ـی حوزەیراندا کۆتایی بێت. ئەم رێککەوتنە بە جۆرێک داڕژابوو کە سوود بە یاریزانەکە و یانە ئەڵمانییەکەش بگەیەنێت. لەبری ئەوەی بە شێوازی بێبەرامبەر یانەکە جێبێڵێت، شلۆتێربێک رازی بوو بمێنێتەوە و لە هەمان کاتدا نرخێکی روون بۆ داهاتووی دیاری بکات، شتێک کە تاوەکوو رادەیەک لە بۆندسلیگادا باو نییە.

ئەو نرخەش بە تەواوی 50 ملیۆن یۆرۆیە. ئەم یاریزانە ئەڵمانییەی مۆندیال ئاگاداری ئەوەیە کە ریال مەدرید لە بازاڕدا دەگەڕێت، وەکوو ئەوەی پێشتر لەلایەن سکای سپۆرتەوە بڵاوکرابووەوە و دەگوترێت چاوەڕێی پەیوەندییەکە کە بتوانێت گواستنەوەکەی پشتڕاست بکاتەوە. بوونی بەندێکی جێگیری هەڵوەشاندنەوەی گرێبەست، هەر پرۆسەیەک بە شێوەیەکی بەرچاو ئاسانتر دەکات.

دۆرتموند خۆی بۆ ئەگەری رۆشتن ئامادە دەکات

لە هەمان کاتدا، بۆرووسیا دۆرتموند لە ئێستاوە لە بازاڕی گواستنەوەدا چالاکە و بەدوای دڵێکی بەرگریی چەپەدا دەگەڕێت وەکوو پێشبینییەک بۆ ئەگەریی رۆشتنی یەکێک لە گرنگترین یاریزانەکانی لە وەرزەکانی دواییدا.

ئەزموون، بەهێزیی بەرگری و هێمنی لەو کوالێتییانەن کە دەگوترێت جۆزێ مۆرینیۆ زۆرترین بایەخیان پێدەدات لەم بەرگریکارە ئەڵمانییەدا. راهێنەرە پۆرتوگالییەکە پێی وابووە شلۆتێربێک لەگەڵ ئەو پڕۆفایل و فەلسەفەی یاریکردنەدا دەگونجێت کە بۆ تیمەکەی دەیەوێت.

ئامانجی ریال مەدرید ئەوەیە کە ئامادەکارییەکانی پێش وەرز بە پێکهاتەیەکی تەواو جێگیر و تەواوکراوەوە دەست پێبکات. بۆ بەدیهێنانی ئەمەش، مانگێک لە کاری چڕ لەپێشە، چ لە رووی هێنانی گرێبەستی نوێ و چ لە رووی گواستنەوەی دەرەوەی یانەکە. لەنێو یانەکەدا راو بۆچوونی مۆرینیۆ ئێستا قورسایییەکی بەرچاوی هەیە؛ سەردەمەکە گۆڕاوە و ئێستا راهێنەرەکە رۆڵێکی گەورە لە زۆرێک لەو بڕیارانەدا دەگێڕێت کە دەدرێن.