گرێبەستی ئەستێرەیەک لە مەترسیدایە؛ رۆیشتنی لیڤاندۆڤسکی گورزێکی کوشندە لە بارسێلۆنا دەدات

یاریگا –

گرێبەستی گواستنەوەی ئەستێرەیەکی ناودار بۆ بارسێلۆنا لە مەترسیدایە.

بارسێلۆنا بڕیاریداوە پرۆسەی گواستنەوەکە رابگرێت، هەرچەندە بە تەواوی لە پلانەکانی نەسڕیوەتەوە، چونکە ئێستا لەپێشینەی کارەکانیان هێنانی هێرشبەرێکە، ئەمەش بووەتە هۆی دروستبوونی دڵەڕاوکێ لە ئیتالیا.

هەم یانەی ئینتەر و هەم یاریزانەکەش چاوەڕوانی ئەوە بوون بارسا لەم هەفتەیەدا هەنگاوێک بێتە پێشەوە و ئۆفەرێکی فەرمی پێشکەش بکات، بەڵام ئەمە تاوەکوو ئێستا رووی نەداوە. باستۆنی و ئینتەر بەپەرۆشن بۆ ئەوەی داهاتووی ئەم بەرگریکارە روون بێتەوە، چونکە بڕیارەکە کاریگەرییەکی زۆری لەسەر پلانە وەرزشییەکانی یانە ئیتالییەکە دەبێت.

بارسا گرنگیپێدانی خۆی بە باستۆنی پشتڕاستکردووەتەوە و لە ئێستاوە رێککەوتنێکی روونی لەگەڵ یاریزانەکەدا هەیە بۆ ماوەی 5 وەرزی داهاتوو، بەڵام هێشتا پێویستە هەردوو یانەکە بگەنە لێکتێگەیشتن. ئینتەر تەنانەت بە ئاشکرا ئاڵەنگاریی بارسای کردووە بۆ دەستپێکردنی گفتوگۆ فەرمییەکان، بەڵام یانە کاتالوونییەکە دەیەوێت پێش دەستپێکردنی کۆتا هەنگاو، هەموو پارچەکانی پڕۆژەکەی رێک بخات. بارسا داوا لە بریکارەکانی یاریزانەکە دەکات ئارام بگرن، چونکە باستۆنی هەمیشە ئامادەیی تەواوی خۆی بۆ ئەنجامدانی ئەم گواستنەوەیە نیشانداوە.

پلانی بارسا: سەرەتا هێرشبەرێک و پاشان بەرگریکار

پلانی بارسێلۆنا روونە: سەرەتا واژۆکردنی گرێبەست لەگەڵ هێرشبەرێک بەهۆی رۆیشتنی رۆبێرت لیڤاندۆڤسکی. بەشی وەرزشیی گفتوگۆکانی بۆ هێنانی هێرشبەری بەرازیلی جواو پێدرۆ لە یانەی چێڵسی خێرا کردووە، ئەمەش بەهۆی ئەو قورسییانەی لە گرێبەستی خولیان ئالڤارێزدا هەن و هیوادارن بە خێرایی بگەنە چارەسەرێک. تەنیا دوای مسۆگەرکردنی جواو پێدرۆ یان هەر بژاردەیەکی دیکەی هێرشبەری، یانەکە دەزانێت لە توانایدا هەیە چەندێک پارە بۆ دڵێکی بەرگریی دابین بکات. ئەمەش دەبێتە خاڵێکی گرنگ لە هەوڵەکانیان بۆ هێنانی باستۆنی، کە ئامانجی ژمارە یەکی دیکۆیە.

فەرمی؛ ئەستێرەیەک بارسێلۆنا جێدەهێڵێت

ئینتەر ئاماژەی بەوە کردووە کە نرخی کۆتایی پرۆسەکە لە دەوروبەری 60 ملیۆن یۆرۆ دەبێت، بەڵام بارسا ئەم سیناریۆیە بە دوور دەزانێت. بیرۆکەی یانە کاتالۆنییەکە ئەوەیە یاریزانێک بخاتەنێو گرێبەستەکەوە بۆ کەمکردنەوەی نرخەکە، هەرچەندە تاوەکوو ئێستا هیچ وردەکارییەکیان ئاشکرا نەکردووە، ئەمەش نیگەرانییەکانی ئینتەری زیاتر کردووە. بەڵام دەکرێت لە کۆتاییدا کات لە بەرژەوەندی بارسا بێت.

بژاردەکانی دیکەی بارسا لە هێڵی بەرگریدا

بارسێلۆنا چاودێریی بژاردەکانی دیکەش دەکات وەکوو کریستیان رۆمێرۆ، کە دەکرێت بە نرخێکی نزمتر بەردەست بێت ئەگەر تۆتنهام دابەزێت، شتێک کە لە ماوەی هەفتەیەکدا یەکلایی دەبێتەوە. دوای ئەوە، بارسا بڕیاری سەرەکی خۆی سەبارەت بە پێگەی دڵی بەرگریی دەدات، کە پێدەچێت پێویستی بە چەند رۆیشتنێکی ستراتیژیش هەبێت لە پێکهاتەی تیمەکەدا.

بۆ ئێستا، باستۆنی بە ئاشکرا قسەی نەکردووە و چاوەڕێی بارسا دەکات ئۆفەرێک پێشکەش بکات. ئەگەر ئەوە روو بدات، رەنگە ئەو کاتە بە شێوەیەکی چالاک بەشدار بێت لە یارمەتیدانی هەردوو یانەکە بۆ گەیشتن بە رێککەوتن. ئینتەر بەشێک لە پلانی هاوینەی خۆی لەسەر ئەگەریی ئەم فرۆشتنە هەڵچنیوە، کە پارەیەکی زیاتریان پێدەبەخشێت بۆ خەرجکردن لە بازاڕدا.