یاریگا –
ئەنچیلۆتی ئامادەبوونی بێڵینگهامی بۆ یاریی سبەی بەرامبەر بارسێلۆنا یەکلاکردەوە.
کارلۆ ئەنچیلۆتی راهێنەری ریال مەدرید لە کۆنگرەی رۆژنامەوانی پێش یاریی کلاسیکۆ لە یاریی کۆتایی جامی سوپەری ئیسپانیا لەبارەی یاریزانەکانی گوتی :’جود بێڵینگهام و تەواوی یاریزانەکانی یانەکەمان بۆ یاریی سبەی بەرامبەر بارسێلۆنا ئامادەن، بێڵینگهام سەلامەتە و لە پێکانەکەی چاکبووەتەوە’.
ئەنچیلۆتی لەبارەی ویستی تۆڵەکردنەوەیان لە یارییەکەی سبەی، دەڵێت :’هەمیشە یاریکردن بەرامبەر بارسێلۆنا شتێکی نایابە، کلاسیکۆ هەر کلاسیکۆیە، پێویستە لە یاریی سبەی ئەو هەڵانە دووبارە نەکەینەوە کە لە نیوەی دووەمی یاریی رابردوو کردوومانن، ئێمە لە کلاسیکۆی رابردوو 12 ئۆفسایدمان لەسەر هەژمارکرا، شرۆڤەی ئەوەمان کردووە و پێویستە پێداچوونەوە بکەین’.
هەروەها کارلۆ دەشڵێت :’بارسێلۆنا هەمیشە رکابەرێکی مێژوویی ئێمەیە، کەس ناتوانێت پێشبینی بۆ ئەنجامی یارییەکە بکات، یارییەکەی سبەی بۆ ئێمە و ئەوان قورس دەبێت، بەڵام ئێمە هەوڵ دەدەین هەرچی لەتواناماندا هەیە بیکەین بۆ ئەوەی نازناوێکی دیکە بەدەست بهێنین، ئەگەر سبەی دانی ئۆلمۆ یاریی بکات، پێویستە سنوورێکی بۆ دابنێین چونکە یاریزانێکی نایابە و لە هەر ساتێکدا دەتوانێت کاریگەری دروست بکات’.
راهێنەرەکەی مێرەنگی لەبارەی کاریگەریی راپۆرتەکانی کەناڵی ریال مەدرید لەبارەی ناوبژیوانی یارییەکە دەڵێت :’خیل مانزانۆ ناوبژیوانێکی باشە و ئەزمووندارە، پێشتر ناوبژیوانی چەندان یاریی گرنگ بووە، ریال مەدریدیش هەمان بۆچوونی منی هەیە’.
سبەی یەکشەممە کاتژمێر 22:00 ریال مەدرید و بارسێلۆنا لە یاریی کۆتایی جامی سوپەری ئیسپانیا لە سعوودیە بەیەک دەگەن، کە ساڵی رابردوو ریال مەدرید لە یاریی کۆتایی 4-1 لە بارسێلۆنای بردەوە و جامی سوپەری بەدەستهێنا.
