مانچێستەر یونایتد یاریزانێکی فەڕەنسی دەگوازێتەوە

یاریگا –

لێنی یۆرۆ ئەمڕۆ گەشتی مانچێستەر دەکات و پشکنینی پزیشکی بۆ مانچێستەر یونایتد دەکات.

تۆڕی ئاتلێتیک بڵاویکردووەتەوە، مانچێستەر یونایتدو و لیل لەسەر نرخی گواستنەوەی یۆرۆ رێککەوتوون و ئەمڕۆ پشکنینی پزیشکی دەکات و لەسەر مەرجەکانی کەسی رێکدەکەون.

بەگوێرەی زانیارییەکان، بڕی گواستنەوەی یۆرۆ بۆ مانچێستەر یونایتد دەگاتە 62 ملیۆن یۆرۆ.

لە ماوەی رابردوودا، ریال مەدرید بەجددی هەوڵی گواستنەوەکانی یۆرۆی دەستپێکردبوو، بەڵام هیچ ئاماژەیەک بۆ ئۆفەرەکەی ریال نییە.

لیل بڕیاری کۆتایی لەسەر چارەنووسی یۆرۆ داوە، چونکە مان یونایتد ئامادەبوو بڕی پارەی داواکراو پێشکەش بکات و لەلایەکی دیکەشەوە، تەنیا ساڵێک بۆ بەسەرچوونی گرێبەستی یۆرۆ لەگەڵ یانە فەڕەنسییەکە مابوو.

یاریزانی نێودەوڵەتی فەڕەنسا، یەکێکە لە دیارترین بەرگریکاری لیگ وەن و دەمێکە ئێریک تێن هاخ داوای کردووە.

لەلایەکی دیکەوە، مان یونایتد کار لەسەر گواستنەوەی ماتیاس دی لیخت، بەرگریکاری بایرن میونشن و جاراد برەینسوەیت، بەرگریکاری ئێڤەرتن دەکات، بەڵام گواستنەوەی هەردووکیان بەهۆی داراییەوە ئەستەمە.