یاریگا –
یانەکان و لقی شارەکانی هەرێمی کوردستان لە فیدراسیۆنی تۆپی پێی عێراق لە بەیاننامەیەکی هاوبەشیاندا کە ئاڕاستەی فیدراسیۆنی تۆپی پێی عێراقیان کردووە، هەڕەشەی کشانەوە لە سەرجەم خول و پاڵەوانێتییەکانی ئەم وەرزەی تۆپی پێی عێراق دەکەن.
نوێنەرانی هەرێمی کوردستان لە دەستەی گشتی فیدراسیۆنی تۆپی پێی عێراق کە لە یانەکانی هەولێر، دهۆک، زاخۆ، نەورۆز و پێشمەرگەی سلێمانی و لقی فیدراسیۆنی تۆپی پێی عێراق لە شارەکانی هەولێر و سلێمانی و دهۆک پێکهاتوون، لە بەیاننامەیەکیاندا رایانگەیاندووە :’ئەمڕۆ شەممە 30ـی دیسەمبەری 2023 ئامادەی کۆبوونەوەی دەستەی گشتی فیدراسیۆنی تۆپی پێی عێراق نەبووین، بەمزووانە کۆبوونەوەیەکی بەپەلە دەکەین بۆ ئەوەی گفتوگۆ لەبارەی کشانەوەمان لە سەرجەم چالاکییەکانی وەرزی 2023/2024 بکەین’.
هەروەها لە بەیانناممەکەی نوێنەرانی هەرێمی کوردستان لە فیدراسیۆنی تۆپی پێی عێراقدا هاتووە :’بەمدواییانە حکومەتی فیدڕاڵی بڕیارێکی دڵخۆشکەری دەرکرد پاڵپشتی دارایی بە 16 یانە بدرێت، بەڵام بەداخەوە لەوێش یانەکانی هەرێمی کوردستان (دهەولێر، دهۆک، زاخۆ، نەورۆز) لەم شایستە داراییە بێبەشکراون، کە ئەمەش پێشهاتێکی مەترسیدارە و بەم هەنگاوە خولەکانی عێراق بنەمای یەکسانی و دادپەروەری و دەستپاکی لەدەست دەدات، بە هەمان شێوە بەمدواییانە لقی شارەکانی هەرێمی کوردستان (هەولێر، دهۆک، سلێمانی) لە فیدراسیۆنی تۆپی پێی عێراق لە هەموو شایستە داراییەکان بێبەشکراون و مافەکانیان وەرنەگرتووە’.
بەیاننامەکەی یانەکان و لقی شارەکانی هەرێمی کوردستان لە فیدراسیۆنی تۆپی پێی عێراق
برایانمان لە کۆمەڵەی گشتی و لیژنەی جێبەجێکاری، ئێمە وەک یانەکان و لقی شارەکانی هەرێمی کوردستان، تاوەکو ئێستا پاڵپشتیکاری ئەم دامەزراوەیەین، زۆرمان بۆ بەرەوپێشچوون و پاراستنی کاریگەری کردووە. مێژوو گەواهی بۆ یانەکانی هەرێم بۆ بەشداریکردن لە خولەکان دەدات، هەروەها هەموو هەوڵێکی بۆ بەرەوپێشچوونی تەواوی پاڵەوانیەتییەکان داوە. تەنانەت لە سەردەمی رژێمی لەناوچوو، کاتێک خەڵکی ئێمەی دەکوشت و هەستمان بە بەرتەسکییەکی زۆر دەکرد، بەڵام لە بەشداریکردن لە خولەکان بەردەوام بووین. فێدراسیۆن و لیژنەی ئۆڵێمپی ئەو سەردەمیش، بە هەمان شێوەی یانەکانی دیکەی عێراق، مامەڵەیان لەگەڵ ئێمەدا دەکرد.
برایان بەڕێز، لە چەند رۆژی رابردوودا، حکومەتی فیدڕاڵی بڕیارێکی دڵخۆشکەری بۆ تەواوی وەرزشوانان دەرکرد، کاتێک بڕیاری پاڵپشتیکردنی یانەکانی بەشدار لە خولی ئەستێرەکانی عێراق کرد، کە ژمارەیان 16 یانەیە. بەڵام ئەوەی جێگەی داخە، بڕیارەکە هەر چوار یانە بەشداربووەکانی هەرێمی کوردستانی نەگرتەوە کە ئەوانیش بریتین لە (هەولێر، دهۆک، زاخۆ و نەورۆز). ئەمە پێشهاتێکی زۆر مەترسیدارە، چونکە خولەکە بنەمای یەکسانی دەرفەتەکان لەدەستدەدات و لە چەقی نەزاهەتی تۆپی پێ دەدات، چونکە لە بنەڕەتدا لەسەر بنەمای شەفافیەت و دادوەری و یەکسانبوون بونیادنراوە. هەروەها بەم دواییە هیچ شایستەیەکی دارایی لقەکانی یەکێتییەکەی لە هەرێمی کوردستانی نەگرتووەتەوە. بۆیە ئەوانەی واژۆیان لەسەر ئەم بەیاننامەیە کردووە کە نوێنەری یانەکانی هەرێمی کوردستانن و بەشداری لە خولی ئەستێرەکانی عێراق دەکەن و یانەی پێشمەرگەی سلێمانی (بەشداری خولی نایابی عێراق دەکات)، هەروەها لقەکانی یەکێتی تۆپی پێی عێراق لە هەرێمی کوردستان ئامادەی کۆبوونەوەکانی یەکێتیی تۆپی پێی عێراق نابن کە بڕیارە شەممە 30ی یەنایەر/کانوونی یەکەم 2023 بکرێت.
لە بەشی دووەمی بەیانناممەکەیاندا، یانەکانی هورێمی کوردستان هەڕەشەی کشانەوەیان لە چالاکییەکانی فیدراسیۆنی تۆپی پێی عێراق کردووە.
‘کۆبوونەوەیەکی بەپەلە بۆ تاوتوێکردنی بایکۆتی چالاکییەکانی وەرزشی یەکێتیی تۆپی پێی عێراق بۆ ئەم وەرزە دەکەین. تاوەکو دۆخەکە لەبار دەبێت و دەرفەتەکان یەکسان دەبن، بۆ ئەوەی رکابەری لەگەڵ برایانمان لە یانەکانی دیکە لەسەر یەک رێچکە بکەین.
لە ڕێگەی ئەم بەیاننامەیەوە، دەمانەوێت دەنگەکانمان بە سەرۆککۆمار، سەرۆکوەزیران، سەرۆکی لیژنەی ئۆڵێمپی، جێگری سەرۆکی ئەنجوومەنی نوێنەران، راوێژکارانی سەرۆک وەزیران، وەزیری وەرزش و لاوان و ئەمینداری گشتی ئەنجوومەنی وەزیران بگەیەنین، داوایان لێدەکەین شانبەشانی کوڕانی خۆیان لەم وڵاتە بوەستن، بەڕەچاوکردنی نەتەوە و پەیوەستبوونیان. ئەمە پەیمانی ئێمەیە و متمانەیەکی زۆرمان بە نیاز و دیدگای گشتگیریان هەیە’.
ئەوانەی واژۆیان کردووە (یانەکانی نەورۆز، دهۆک، هەولێر، زاخۆ، پێشمەرگەی سلێمانی، لقی فیدراسیۆنی تۆپی پێی عێراق لە شارەکانی هەولێر و سلێمانی و دهۆک)
