محەمەد سەڵاح داوای رۆیشتنی لە لیڤەرپوول کردووە؟

یاریگا –

یورگن کڵۆپ دووپاتیکردەوە، محەمەد سەڵاح داوای رۆیشتنی لە لیڤەرپوول نەکردووە.

کەمێک لەمەوبەر لە کۆنگرەیەکی رۆژنامەوانی، لە یورگن کڵۆپی ئەڵمانی و راهێنەری یانەی لیڤەرپوول پرسرا، ئایە لە هاوینی رابردوو ئۆفەری سعودییەکانیان رەتکردووەتەوە بۆ دەستبەردربوون لە محەمەد سەڵاح یاخود نا.

لە وەڵامدا کڵۆپ رەتیکردەوە هیچ لەبارەی ئۆفرەکە بزانێت و گوتی:

هیچ شتێک لەبارەی ئەو ئۆفەرە نازانم، گرنگ نییە… سەڵاح لەگەڵمان بەردەوامە، نەهاتە لام داوای رۆیشتن بکات، منیش بەهیچ شێوەیەک بیرم لەوە نەکردووەتەوە رێگەی پێبدەم بڕوات

کڵۆپ لە درێژەی قسەکانیدا گوتی:

بارودۆخی سەڵاح لە لیڤەرپوول زۆر باشە، لەدەرەوەی یاریگاش هیچ گرفتێکی نییە، بەڕاستی سەڵاح ناوازەیە و چێژ بە تیپەکە دەبەخشێت.

لە هاوینی رابردوو یانەی ئیتیحادی سعودی هەوڵێکی زۆریدا، محەمەد سەڵاح بەرەو خولی رۆشەنی سعودی بگوازێتەوە، بەڵام کڵۆپ و لیڤەرپوول بەهیچ شێوەیەک ئامادەنەبوون دەستبەرداری ئەستێرە میسڕیەکە ببن.

سەڵاح بە بزوێنەری سەرەکی لیڤەرپوول دادەنرێت، لەم وەرزەش لە سەرجەم پاڵەوانێتییەکاندا لە 14 یاریدا 10 گۆڵی بۆ رێدز کردووە و 4 گۆڵیشی درووستکردووە.