مۆرینیۆ بە توندی وەڵامی كاسانۆ دەداتەوە

یاریگا –

جۆزێ مۆرینیۆی پۆرتوگالی و راهێنەری یانەی رۆمای ئیتاڵی وەڵامی لێدوانەكانی ئەنتۆنیۆ كاسانۆی دایەوە.

چەند رۆژێك پێش ئێستا كاسانۆ هێرشیكردە سەر مۆرینیۆ و بە ئەكتەر وەسفی كرد.

مۆرینیۆ لە وەڵامدا گووتی:

هەمووان ئازادن لە رەخنەگرتن، بەڵام کاتێک باس لە کەسانی وەک ئەنتۆنیۆ کاسانۆ دەکرێت دۆخەکە جیاوازە، ئەو سەرقاڵی ئەو بابەتانەیە لە کاتێکدا ئەوانی دیکە کار دەکەن.

بەردەوام بوو گووتی:

ئەگەر رەخنە لە رۆما یان مۆرینیۆ بگرن، گرنگ نییە، چونکە لە رێگەی ئەوەوە هەندێک خۆشی بەدەستدەهێنن، کاسانۆ لە رۆما و ئینتەرمیلان و ریاڵ مەدرید یاریی کردووە، لە ئیسپانیا بەهۆی چاکەتەکەیەوە یادی دەکەنەوە، لە رۆماش جامی سوپەری بەدەستهێنا بەبێ ئەوەی یاری بکات، لەگەڵ ئینتەریش هیچی نەبردەوە.

لە كۆتایشدا راهێنەرەكەی رۆما گووتی:

هەمووان دەزانن من چیم لەو سێ یانەیەدا بەدەستهێناوە، بۆیە هەمیشە کێشەی لەگەڵ مندا دەبێت ، لەکاتێکدا من هیچ کێشەیەکم لەگەڵ ئەودا نییە.

شەوی رابردوو رۆما بە تاكە گۆڵێكی پاولۆ دیبالا لە تۆرینۆی بردەوە و كۆی خاڵەكانی لە سێریا ئەی بۆ 53 خاڵ بەرزكردەوە و لە ریزبەندی سێیەم دێت.