یاریگا –
ئێستا سەرنجی تەواوی تۆپی پێی ئیسپانیا لەسەر کەیسی نێگرێیرایە و ئێستا ریال مەدریدیش چووەتە نێو کەیسەکە و ئامادەیە بە هەموو شێوەیەک بەرگری لە بەرژەوەندییەکانی بکات، وەک لە بەیاننامەکەیاندا هاتبوو.
ئێدواردۆ ئیتورالدی گۆنزالێز، لە ساڵانی 1995 تاوەکو 2012 ناوبژیوانی یارییەکانی لالیگا بوو و ئێستا شیکەرەوەی رادیۆی کادێنا سێرە، کە رۆژانە شیکردنەوە بۆ بڕیاری ناوبژیوانان دەکات، بەڵام ئێستا لەسەر کەیسی نێگرێیرا هاتووەتە دەنگ.
دوو رۆژ بەر لە ئێستا، کەناڵی ریال مەدرید ڤیدیۆییەکی لە دژی ئیتۆرالدی بڵاوکردەوە، ئەمەش لە درێژەی هەڵمەتی یانە شاهانەکە لە دژی کەیسی نێگرێیرا. بەڵام ئیتۆرالدی بە توندی وەڵامی ریال مەدریدی دایەوە.
ئەمە شێوازی کارکردنی تەلەڤزیۆنە (کەناڵی ریال مەدرید) هەرچەندە ئەوان رۆژنامەنووسیشن، کێ منی بانگ کردووەتە ژووری تایبەت؟ لێکۆڵینەوەی تێدا بکەن. ئەوکات دەبینن چۆن هەندێ کەسایەتی هەوڵ دەدەن، فشار لە خەڵک بکەن. لە یاری بەرامبەر دیپۆرتیڤۆ لاکارۆنیا کە 6-1 تەواو بوو، لەگەڵ یاریدەدەرانم یاریگامان جێهێشت، ئەو کاتە کەسێک هات و منی بردە ژوورێکی تایبەت و پێی گوتم ”تەنیا داوای ئەوەت لێدەکەم، وەک بارسا فیکە بۆ تیپەکەم بەکاربهێنت”.
ئیتۆرالدی نهێنی زیاتری لەبارەی بابەتەکە بڵاوکردەوە و گوتی
ئەو لە ریال مەدرید بوو، کەسایەتییەکە ویستی من بخاتە ژوورێکی تایبەت و بە تەنیا قسە بکات، بەڵام رەتمکردەوە، دوای کاتژمێر و نیوێک، وردەکارییەکانم بە لیژنەی هونەری ناوبژیوانان گەیاند. چونکە بابەتەکە زۆر راستەقینە بوو بۆ من. با رۆژنامەنووسانی کەناڵی ریال مەدرید بچن لێکۆڵینەوە لەو بابەتانە بکەن، دەتوانم یارمەتیان بدەم و با لە سەرووی هەرەمەکەوە دەست پێبکەین.
🤷♂️"Después de un Real Madrid – Depor una persona me apartó y me quiso meter en una habitación. Me dijo 'solo pido que nos pitéis igual que al Barça"
💢 "Le dije a ver si me estaba gastando una broma. El señor era Florentino Pérez"
💭@itu_edu, en el @carrusel Canalla pic.twitter.com/XrR1SxUUlV
— Carrusel Deportivo (@carrusel) March 13, 2023
هەرچەندە ئیتۆرالدی نەیدەویست ناوی کەسایەتییەکە ئاشکرا بکات، بەڵام لە کۆتاییدا گوتی
زۆرجار رووبەڕووی ئەم دۆخە نەبوومەتەوە، هیچ سەرۆکێک منی نەخستووەتە ژوورێکی تایبەت، تەنیا سەرۆکێک منی بردە ژوورێکی تایبەت، ئەویش فلۆرێنتینۆ پێرێز بوو. ئەمە راستییەکە و روویداوە و راپۆرتی خۆشم بە لیژنەی تەکنیکی ناوبژیوانان دا. بۆ ئەوەی بزانن فشارەکان چۆن دەکرێنە سەر ناوبژیوانان.
پێشتر ئیتۆرالدی چەندین جار رایگەیاندبوو، ناوبژیوانی لە ئیسپانیا زۆر ئەستەمە کاتێک ناچار دەبیت سواری پاسی ریال مەدرید ببیت و مەبەستی لە هەڵمەتە میدیاییەکانی نزیک لەو یانەیەیە.
