ئیمۆبیل بووە گۆڵکاری مێژوویی لازیۆ لە کالچیۆ

یاریگا-چیرۆ ئیمۆبیل گۆڵکاری یانەی لازیۆ شەوی رابردوو توانی ژمارەیەکی پێوانەیی مێژووی یانەکە بشکێنێت.

لازیۆ بە گۆڵێکی بێ وەڵام لە ڤینیزیای بردەوە و گۆڵەکەش چیرۆ بە لێدانی سزا تۆماریکرد، هێندە بەس بوو بۆ ئەوەی هێرشبەرە ئیتاڵییە ٣٢ ساڵەکە ژمارەی گۆڵەکانی بگەیەنێتە ١٤٤ گۆڵ لەگەڵ لازیۆ تەنها لە خولی ئیتاڵی.

بەوەش ناوبراو ژمارە پێوانەییەکەی سیلڤیۆ پیۆڵای ئەستێرەی مێژوویی لازیۆی شکاند. بەر لەم ژمارە پێوانەییە، ئیمۆبیل توانیبووی ببێتە گۆڵکاری مێژوویی لازیۆ لەسەر ئاستی سەرجەم پاڵەوانێتییەکان بە ١٥٩ گۆڵ و تەنها ریکۆردی خولی ئیتاڵی مابوو لە پیۆڵای بسەنێتەوە.

لازیۆ لە پلەی پێنجەمی خولی ئیتاڵیدایە و لە پاڵ ئەتەلەنتا، رۆما و فیۆرەنتینا دەجەنگن لەسەر مسۆگەرکردنی گەیشتن بە  چامپیۆنزلیگ یاخود یۆرۆپالیگ.