چێڵسی و ئینتەر میلان لەسەر گواستنەوەی لوکاکو گەیشتنە رێکەوتن

یاریگا–
یانەی چێڵسی ئینگلیزی ماوەیەکە هەوڵ بۆ گواستنەوەی رومێلو لوکاکو هێرشبەری یانەی ئینتەر میلانی ئیتاڵی دەدات و ئەو یانەیە لە پێناو گواستنەوەی گۆڵکارەکە بلوز، ئامادەیە پارەیەکی خەیاڵیش خەرج بکات.

دەیڤید ئۆرنستین لە رۆژنامەی ئاتلێتیکی بەریتانی زانیاری دەستکەوتووە هەردوو یانە لەسەر گواستنەوەی یاریزانە بەلجیکیەکە گەیشتوونەتە رێکەوتن و بریارە ئەو یاریزانە بە مووچەی ساڵانە 12 بۆ 13 ملیۆن پاوەند پەیوەندی بە یانەکەی لەندەنی پایتەختەوە بکات و بەم زووانەش گرێبەستەکەی ئاشکرا دەکات.

سەرچاوەکە باسی لە تێچووی گرێبەستەکە نەکردووە، بەڵام دەنگۆیەک هەیە ئینتەر میلان بەرامبەر نزیکەی 115 ملیۆن یۆرۆ رازی بووە دەستبەرداری ئەو یاریزانە بێت.