یاریگا–
بەهۆی مەترسیەکانی ڤایرۆسی کۆرۆنا تاوەکو ئێستا یارییەکانی کۆپا ئەمریکای 2021 کە لە بەڕازیل بەڕێوەدەچێت بەبێ ئامادەبوونی هاندەران بووە، بەڵام ئەگەرێک هەیە لە یاری کۆتایی رێگە بە نزیکەی 8 هەزار هاندەر بدرێت لە یاریگای ماراکانا ئامادەبن.
رۆژنامەی سپۆرتی کەتەلۆنی ئاشکرای کردووە کە فێدراسیۆنی تۆپی پێ ئەمریکای باشوور بیر لەوە دەکاتەوە بە رەزامەندی حکومەتی بەڕازیل رێگە بە ئامادبوونی 8 هەزار هاندەرن بدەن بۆ ئەوەی لە نزیکەوە لە یاریگای ماراکانا لە شاری ریۆ دێ جانیەرۆ بینەری یاری کۆتایی کۆپا ئەمریکا لە نێوان هەردوو هەڵبژاردەی بەڕازیل و ئارجێنتینا بن، بەڵام تاوەکو ئێستا ئەم بابەتە لەلایەن حکومەتی وڵاتی میوانداری یەکلایی نەکراوەتەوە.
سەرچاوەکە ئەوەشی بڵاوکردووەتەوە ئەگەر ئەم داوایە پەسەند بکرێت و رێگە بە ئامادەبوونی هاندەران لە یاری کۆتایی کۆپا ئەمریکا بدرێت، ئەو کات چوار هەزار بلیتی یاری کۆنمیبۆل دابەشی دەکات و چوار هەزارەکەی دیکەش لە نێوان هەردوو هەڵبژاردە دەبێت.
