یاریگا –
جۆزێ مۆرینیۆ، راهێنەری پورتوگالی، بووەتە بینەرێکی سەرەکیی ئەو تۆفانە کارگێڕییەی کە یانەی ریال مەدریدی گرتووەتەوە.
بەگوێرەی زانیارییەکانی خۆسێ فێلیکس دیاز، سەرنووسەری رۆژنامەی ئاس، مۆرینیۆ ئێستا لە هەموو کاتێک زیاتر بەپەرۆش و پاڵنەری بۆ دروستبووە تاوەکوو بگەڕێتەوە بۆ مەدرید و پۆستی راهێنەرایەتی یانەکە وەربگرێتەوە.
کاتژمێری یەکلاییکەرەوە
هەرچەندە مۆرینیۆ ئێستا سەرنجی لەسەر یانەی بێنفیکایە بۆ گەیشتن بە چامپیۆنزلیگی وەرزی داهاتوو، بەڵام چاوی لەسەر ریال مەدریدە. ئەو پەیامەی پێگەیشتووە کە ئێستا کاتی یارمەتیدانی ریال مەدریدە بۆ بنیاتنانەوەی پێگەی وەرزشیی یانەکە. مۆرینیۆ خۆی ئاشکرای کردووە کە هەفتەی داهاتوو بڕیاری کۆتایی خۆی رادەگەیەنێت، ئەمەش تەنیا چەند رۆژێک بەرلە کۆتاییهاتنی وادەی کاراکردنی بڕگەی هەڵوەشاندنەوەی گرێبەستەکەی لەگەڵ بێنفیکا.
پێرێز و مۆرینیۆ؛ ‘دوا سەما’
فلۆرێنتینۆ پێرێز، کە وەکوو سەرۆکی کاتی بەردەوام دەبێت تاوەکوو کۆتایی هەڵبژاردنەکان، دەیەوێت گرێبەست لەگەڵ مۆرینیۆ واژۆ بکات. مۆرینیۆ هەست بە دڵخۆشییەکی زۆر دەکات کە جارێکی دیکە بووەتەوە بە پاڵەوانی سەرەکیی رووداوەکان. ئەو پێی وایە مێژووەکەی لەگەڵ ریال مەدرید لە ساڵی 2013 بە نیوەچڵی جێماوە و ئێستا کاتی دوا سەمای چاوەڕواننەکراوە لە بێرنابیۆ.
هەرچەندە رووی کۆستا، سەرۆکی بێنفیکا، هەوڵێکی زۆر دەدات بۆ هێشتنەوەی مۆرینیۆ بە گرێبەستێکی نوێ، بەڵام تاوەکوو ئێستا راهێنەرە پورتوگالییەکە هیچ وەڵامێکی ئەرێنی نەداوەتەوە، ئەمەش گومانەکان بۆ گەڕانەوەی بۆ ئیسپانیا زیاتر دەکات.
