لویس فیگۆ راهێنەری داهاتووی ریال مەدرید و پاڵەوانی چامپیۆنزلیگ دیاریی دەکات

یاریگا –

ئەستێرەی پێشووی یانەکانی ریال مەدرید، ئینتەر میلان و بارسێلۆنا، باس لە دۆخی ریال مەدرید دەکات.

لویس فیگۆ، کە ئێستا باڵیۆزی خەڵاتەکانی Laureus World Sportsـە، ئەمڕۆ دووشەممە باسی لە بابەتە هەنووکەییەکانی تۆپی پێ کرد دوای ئەوەی ئەو تیمە ئیسپانییانەی پێشتر یاریی بۆ کردبوون، لە خولی یانە پاڵەوانەکانی ئەوروپا کرانە دەرەوە. سەبارەت بە ریال مەدرید گوتی کاتێک بۆ ماوەی دوو ساڵ نازناو نابەیت، زەنگی مەترسی لێدەدرێت و دانی بەوە دانا کە حەز دەکات ئاتلێتیکۆ مەدرید ببێتە پاڵەوانی چامپیۆنزلیگ.

فیگۆ گوتی:

هەموومان دەزانین ریال مەدرید چ جۆرە ساڵێکی بەڕێکردووە. کاتێک راهێنەر دەگۆڕیت، شتەکان ناسەقامگیر دەبن و خەڵک بەدوای کەسێکدا دەگەڕێن تاوەکوو لۆمەی بکەن. ناتوانم زۆر قسە بکەم چونکە لە ناو ژووری خۆگۆڕیندا نیم، بەڵام کاتێک تۆ یەکێک بیت لە باشترینەکان، نەبردنی نازناو بۆ ماوەی دوو ساڵ زەنگی مەترسی لێدەدات. بۆ ریال مەدرید ئەمە دۆخێکی سەیرە چونکە ئەوان راهاتوون لەسەر بردنەوە، بەڵام ناشکرێت هەمیشە ببەیتەوە. زۆر بێزارکەر دەبوو ئەگەر هەمیشە بتبردایەتەوە. تیمەکانی دیکەش هەن کە خاوەن خواست و ئاواتن، بەڵام لە ریال مەدرید هەمیشە ژاوەژاوەکان گەورەترن. ئێستا خەڵکی باسی راهێنەر دەکەن، کێ خەتابارە و ئەمانە… ئەو شتانەی کە لە راستییدا لە ناو ژووری خۆگۆڕیندا قسەیان لەسەر ناکرێت.

سەبارەت بە شوێنگرەوەی ئالڤارۆ ئاربێلوا بۆ ریال مەدرید، لویس فیگۆ باسی لە دوو ئەگەر کرد، جۆزێ مۆرینیۆ و دیدیێ دیشامپ. ئاماژەی بەوە کرد کە:

دیشامپ ئەزموون و کەسایەتی ئەوەی هەیە راهێنەرایەتی هەر تیمێک بکات، لەوانەش تیمێکی ئیسپانی. مۆرینیۆش هاوڕێیەکە. لە چەندین رۆڵدا ناسیوومە، لە وەرگێڕیی بۆبی رۆبسن، یاریدەدەری لویس ڤان خال تاوەکوو دەگاتە راهێنەری سەرەکی لە ئینتەر. جۆزێ بەهۆی کوالێتی، دیدگا و ئەزموونییەوە هەمیشە بۆ هەموو تیمێک بەنرخ دەبێت.

سەبارەت بە پاڵەوانی خولی یانە پاڵەوانەکانی ئەوروپاش، فیگۆ پێی وایە براوەی چامپیۆنزلیگ لە نێوان دوو تیمی  یاریی پێشکۆتایی پاریس سان جێرمان و بایرن میونشن دەرناچێت، بەڵام خودی خۆی ئارەزوو دەکات تیمێکی دیکە ببێتە پاڵەوان و گوتی:

لەو تیمانەی کە ماونەتەوە، حەز دەکەم ئاتلێتیکۆ مەدرید دوای دۆڕانی چەند کۆتاییەک چامپیۆنزلیگ بباتەوە، هەروەها بەهۆی هاوڕێیەتیشم لەگەڵ میگێل ئانخێل گیل مارین و ئێنریکێ سێرێزۆ.

ئەستێرە پۆرتوگالییەکە سەبارەت بە مایکاڵ ئۆلیس، ئەستێرەکەی بایرن و ئەگەری چوونی بۆ ریال مەدرید گوتی:

ئۆلیس سوپرایزێکی زۆر ئەرێنی بوو. کارەکە قورس دەبێت چونکە لە یانەیەکی گەورەیە و جێهێشتنی ئاسان نابێت. بایرن گرێبەستێکی نایابی واژۆ کرد.