تۆماس فرانک هێرش دەکاتە سەر هاندەرانی تۆتنهام
تۆماس فرانک بە خراپی هێرش دەکاتە سەر هاندەرانی تۆتنهام بەهۆی کاردانەوەیان لە میانەی یارییەکەی نێوان تۆتنهام و فولهام.
سپێرز بە راهێنەرایەتی تۆماس فرانک لە کۆتا چوار یاریدا بردنەوەی نیە و لە سێ یاری رابردوودا سەرجەمیانی دۆڕاندووە. دوێنێ هەر لە خولەکەکانی سەرەتای یارییەکەی فولهام دا بە دوو گۆڵ دواکەوتن، گۆڵی دووهەمیش بە هەڵەیەکی راستەوخۆی ڤیکاریۆی گۆڵپارێز هاتە دی.
دوای هەڵەکە، هاندەرانی تۆتنهام کەوتنە هاهوو و فیکە لێدان دژی ڤیکاریۆی گۆڵپارێز. ئەم پرسە دوای یارییەکە رووبەرووی تۆماس کرایەوە و ئەویش وتی
“ئەمانە هاندەرانی راستەقینەی تۆتنهام نین، حەزم بەوە نەبوو کە وا زوو کەوتنە فیکە لێدان. هاندەرانی راستەقینە دەبێت بەدرێژایی یارییەکە یەکگرتوو بن لەگەڵ یاریزانەکان. دوای یاری ئاساییە بەڵام نەک لەوکاتەدا. ئەوەی روویدا جێگەی قبوڵ کردن نیە.
خودی گۆڵپارێزەکە بۆچوونی جیاوازە و دوای یارییەکە بۆ سکای سپۆرت وتی
بڵێم چی! من بەرپرسم لە گۆڵی دووهەم، هەوڵمدا تۆپەکە دووربخەمەوە بەڵام لێدانەکەم خراپ رۆیشت. هاندەران مافی خۆیانە بەو جۆرە هەستییان دەربڕن کە دەیانەوێت و نابێت بهێڵین ئەوە کاریگەی لەسەر ئاستی ئێمە بکات لەنێو یاریگا. دۆڕانەکەی ئەمڕۆ سەختە و قبوڵکردنی قورسە.
تۆتنهام بەم شکستە لە پلەی دەیەمی ریزبەندی پریمەرلیگدایە و دەشێت بە ئەنجامی یارییەکانی ئەمڕۆ زیاتر دابەزێت. گۆڕینی راهێنەریش کاریگەری لەسەر ئەنجامەکان نەبوو و پارساڵ لە هەمان کاتدا ئەو یانەیە لەگەڵ راهێنەری پێشوودا خاوەنی دوو خاڵ زیاتر بوون.
