
یاریگا –
پرسیارێکی خولاو و پڕمشتومڕی بەردەوام لەنێو شەقامی وەرزشیدا هەیە، ئایا ریال مەدرید یان بارسێلۆنا خاوەنی زۆرترین هاندەرە.
توێژینەوەیەک لە ئیسپانیا بە ناوی ‘خۆشەویستی و رق لە ئیسپانیا، تۆپی پێ وەکو ئایین’ کراوە و تیایدا ریال مەدرید خاوەن زۆرترین هاندەر دەرکەوتووە.
رۆژنامەی مارکا بڵاویکردووەتەوە، توێژینەوەکە پەیوەندی بە ئەنجامی چاوپێکەوتنە لەگەڵ زیاتر لە هەزار کەس، لە ژن و پیاو کە تەمەنیان لە نێوان 18 بۆ 70 ساڵە.
توێژینەوەکە پرسیاری لەبارەی هەر 20 یانەکەی لالیگای تێدابوو و لە زۆربەی شارەکانی ئیسپانیا کرا.
بەگوێرەی توێژینەوەکە بێت، ریال مەدرید 35%ی دەنگەکانی بەدەستهێنا و بارسێلۆناش 27%.
بارسا لە کوێ لەپێش مەدریدە؟
ریال مەدرید لە 10 هەرێمی ئیسپانیا پێش بارسێلۆنا کەوتبوو، کەچی بارسا تەنیا لە هەرێمی کاتالوونیا دەنگی زیاتری هێنا و ریال مەدرید لە پلەی دووەمدا بوو.
ئاتلێتیکۆ مەدرید بەڕێژەی 7% لە پلەی سێیەمدا بوو، لەدوای ئەویش یانەکانی ریال بێتیس و ئاتلێتیک بیلباو بەڕێژەی 6% دێن.
پرسیارێک لە راپرسییەکەدا هەبوو، ئەویش هەڵبژاردنی خۆشەویستترین یانە بەڵام جیا لە یانەی دڵخواز، بەشداربووان بەڕێژەی 18% بێتیسییان هەڵبژارد.



