چێڵسی هێرشبەرێکی دیکەش دەگوازێتەوە

یاریگا –

خەریکە بژاردەکانی ئێنزۆ مارێسکا لە هێڵی هێرشبەری چێڵسی ئاڵۆز دەبێت.

پێکانەکەی لیام دێلاپ، هاوکێشەی چێڵسی بۆ وەرزی نوێ تەواو گۆڕیوە، ئەمەش دوای تووشبوونی ئەستێرە لاوەکە بە پێکان لە یاریی دوێنێ شەممە بەرامبەر فولهام 2-0.

هەر لە ماوەی یارییەکەدا، چێڵسی مۆڵەتی لە سەرپەرشتیارانی پرێمەرلیگ وەرگرت و یاریزانەکەیان گەیاندە نەخۆشخانە، تاوەکو پشکنینی تەواوی بۆ بکرێت و ماوەی گەڕانەوەی دەستنیشان بکرێت، تاوەکو بڕیار لەسەر گواستنەوەی یاریزانی دیکە بدەن.

مارێسکا لە دوای یارییەکە روونیکردەوە، لەوانەیە دێلاپ لە نێوان شەش بۆ هەشت هەفتە دووربکەوێتەوە. رۆژنامەی تێلێگراف بڵاویکردووەتەوە، دێلاپ بۆ ماوەی نزیکە سێ مانگ لە یاریگاکان دووردەکەوێتەوە.

پێکانی دێلاپ، گواستنەوەی نیکۆلاس جاکسنی بۆ بایرن میونشن راگرتووە. رۆژنامەکە بڵاویکردووەتەوە، چێڵسی خەریکی هەڵسەنگاندنی گواستنەوەی کۆنراد هاردەر، هێرشبەری سپۆڕتینگ لیسبۆنە.

بژاردەیەکی دیکەی چێڵسی هەڵوەشاندنەوەی گرێبەستی خواستنی مارک گیویە بۆ سەندرلاند.

جاکسن نایەوێت بگەڕێتەوە چێڵسی و ئێستا لە داکار، پایتەختی سێنیگالە و چاوەڕێی یەکلاییکردنەوەی کەیسەکانە، تاوەکو پەیوەندی بە بایرن میونشنەوە بکات.

دوێنێ شەممە، چێڵسی رەزامەندی لەسەر گەشتکردنی جاکسن بۆ میونشندا، تاوەکو رێکارەکانی گواستنەوەی بەخواستن تەواو بکات، بەڵام لەپڕ و دوای پێکانی دێلاپ، چێڵسی هەموو پڕۆسەکەی راگرت.

بژاردەیەکی دیکەی میونشن، دەستپێکردنی گفتوگۆی نوێیە بۆ گواستنەوەی هەمیشەیی جاکسن و هەڵوەشاندنەوەی گرێبەستی خواستنەکە.