هه‌ولێر به‌رگریگارێكی به‌رازیلی ده‌گوازێته‌وه
دانوستاندنه‌كان به‌رده‌وامه
یاریگا –
هه‌ولێر پلانه‌كانی بۆ زیادكرنی یاریزان بۆ پێكهاته‌كه‌ی كۆتایی نه‌هاتووه له‌گه‌ڵ به‌رگریكارێكی به‌رازیلی له گفتوگۆدایه.
تیپه‌كه‌ی قه‌ڵاو مناره بۆ به‌هێزكردنی پێكهاته‌ی باسم قاسم ده‌یه‌وێت به‌رگریكاری به‌رازیلی لیۆ سێنا بگوازێته‌وه ریزه‌كانی هه‌وڵه‌كان به‌رده‌وامن.
تۆڕی وه‌رزشی یاریگا زانیاری ووردی ده‌ستكه‌وتوه هه‌ولێر له‌گه‌ڵ لیۆ سێنا له گفتوگۆیه‌كی چڕدان، به‌ڵام یاریزانه‌كه هێشتا رازی نه‌بووه درێسی قه‌ڵا و مناره بپۆشێت و له‌سه‌ر هه‌ندێك وورده‌كاری نه‌گه‌یشتوونه‌ته رێكه‌وتن.
وورده‌كاری دانوستاندنی نێوان هه‌ولێر و لیۆ سێینا
گفتوگۆكان له‌گه‌ڵ ئه‌م یاریزانه به نهێنی به‌ڕێوه‌ده‌چن، به‌ڵام یاریگا زانیاری ده‌ستكه‌وتووه، كه یانه‌ی هه‌ولێر ئاماده‌یه له‌نێوان 180 بۆ 200 هه‌زار دۆلار به یاریزانه‌كه بدات، به‌ڵام یاریزانه به‌رازیلیه‌كه داوای 230 هه‌زار دۆلار ده‌كات و به كه‌متر له‌و بڕه پاره‌یه رازی نابێت و درێسی یانه‌كه ناپۆشێت.
یاریگا زانیاری ئه‌وه‌شی ده‌ستكه‌وتووه هێشتا گفتوگۆ له‌گه‌ڵ یاریزانه‌كه به‌رده‌وامه ده‌یانه‌وێت یاریزانه‌كه رازی بكه‌ن بۆ وه‌رزێك په‌یوه‌ندی به هه‌ولێر بكات.
زه‌رد پۆشه‌كه ده‌یه‌وێت به گواستنه‌وه‌ی ئه‌م یاریزانه كه‌لێنێكی گه‌وره له هێڵی به‌رگری پڕ بكاته‌وه، چونكه لیۆ سێنا به توانای به‌رگریكردنی به‌هێز، لێهاتوویی له بڕینی تۆپ و دابه‌شكردنی، ده‌توانێت سه‌قامگیرییه‌كی زۆر به هێڵی به‌رگری تیپه‌كه ببه‌خشێت.
لیۆ سێنا كێیه؟
لیۆ سێنا یاریزانێكی به‌رازیلی خاوه‌ن ئه‌زموون و لێهاتووه، له دڵی به‌رگری یاریی ده‌كات، له 31ی دیسه‌مبه‌ری 1995 له ساوپاولۆی به‌رازیل له‌دایكبووه و ته‌مه‌نی 29 ساڵه، به پێی راست یاریی ده‌كات، ئه‌مه‌ش وای لێده‌كات توانایه‌كی باشی له بڵاوكردنه‌وه‌ی تۆپ و كۆنترۆڵكردنی ناوه‌ڕاستی یاریگادا هه‌بێت.
لیۆ سێنا تا ئێستا 266 یاریی فه‌رمی كردووه، دوو گۆڵی تۆماركردووه و 13 ئاسیستی هه‌یه، كه ئه‌مه‌ش ده‌ریده‌خات سه‌ره‌ڕای ئه‌وه‌ی له به‌رگری یاریی ده‌كات، توانای دروستكردنی هه‌لی گۆڵیشی هه‌یه.
ئه‌م یاریزانه بۆ هه‌ڵبژارده‌ی به‌رازیل له‌سه‌ر هیچ ئاستێك یاریی نه‌كردووه به‌ڵام بۆ یانه‌كانی یدنی ئێف سی، ئاگوا سانتا-ئێس پی، لۆکۆمۆتیڤ پلۆڤدیڤ، گۆیاس، سپێزیا کاڵچیۆ، و ئەتلەتیکۆ-ئێم جی یاریی كردووه.
ئه‌و یاریزانه گرێبه‌ستی له‌گه‌ڵ یانه‌ی سیدنی ئێف سییه‌وه هه‌یه و گرێبه‌سته‌كه‌ی له 30ی حوزه‌یرانی 2026 كۆتایی دێت، هه‌ولێر پێویسته هه‌وڵێكی زۆر بدات بۆ رازیكردنی یاریزانه‌كه و یانه‌كه‌ی ئێستا.
