یاریگا –
کێڤن مولەر، گۆڵپارێزی یانەی هێدینهایم لە یاریی دوێنێی بەرامبەر بوخۆم لە بۆندسلیگا، تووشی پێکانێکی سەختبوو و دەستبەجێ گەیێندرایە نەخۆشخانە.
مولەر لە سەرەتای گێمی دووەمدا، لە کاتی خۆ هەڵدانی بۆ گرتنەوەی تۆپێک، خۆی بە ئیبراهیما سیسۆکۆدا کێشا و گۆڵپارێزە ئەڵمانییەکە بۆ ماوەیەک لەهۆش خۆی چوو.
هەر زوو یاریزانان خۆیان گەیاندە گۆڵپارێزە 24 ساڵییەکە و هەوڵی بە ئاگاهێنانەوەی درا. یارییەکە بۆ ماوەی 11 خوولەک وەستێندرا و تەواوی کامێراکانی گواستنەوەی یارییەکە لە شوێنی بەربوونەوەکە دوورخرانەوە، دوای 11 خوولەک مولەر گواسترایەوە نەخۆشخانە و فڕانک فێلەر شوێنیگرتەوە.
دوای تەواوبوونی یارییەکە، هێدینهایم لە بەیاننامەیەکی بڵاویکردەوە؛
دوای پشکنینی ورد لە نەخۆشخانە، بۆمان دەرکەوتووە کە مێشکی کێڤن مولەر، گۆڵپارێزی یانەکەمان لەرزیوە و ماوەی دوورکەوتنەوەی دیارنییە.
دەمانەوێت سوپاسی تیمی پزیشکی یاریگای ڤۆیس ئارێنا و کارمەندانی نەخۆشخانەی هێدینهایم بکەین.
فڕانک شمیت، راهێنەری هێدینهایم لە دوای یارییەکە دووپاتیکردەوە، مولەر لە نێو یاریگا بە هۆش خۆیدا هاتەوە و دواتر رەوانەی نەخۆشخانە کرا.
مولەر لە ساڵی 2015 پەیوەندی بە هێدینهایم کرد و لەو ساتەوە 327 یاریی لە سەرجەم پاڵەوانیەتییەکاندا کردووە و خاوەنی 95 کلین شیتە.
هەردوو یانەکە 0-0 یەکسانبوون و بوخۆم بە کۆکردنەوەی 22 خاڵ لە دوا پلەی ریزبەندی بۆندسلیگا دێت و هێدینهایم بە 26 خاڵ لە پلەی 16مدایە.
