سەرجەم یارییەکانی رۆژی دووەمی خولی نایابی کوردستان بە یەکسان بوون کۆتایی هات

یاریگا –

لە رۆژی دووەمی یارییەکانی خولی نایابی کوردستان، لە کۆی سێ یاریی سەرجەمیان بە یەکسان بوون کۆتایی هات و شێروانە بەرەو ناسناوەکە هەنگاو دەنێت.

لە گەڕی 25ـی خولی نایابی کوردستان، ئاکرێ لە یاریگای خۆی دوا خولەک گۆڵی یەکسان بوونی تۆمار کرد و بە ئەنجامی 2 _ 2 لەگەڵ شێروانە یەکسان بوو، ئەرکان مەنسوڕ ئەستێرەی ئاکرێ لەم یارییەدا دوای 131 رۆژ گەڕایەوە گۆڵ تۆمار کردن.

بەهۆی شکستی پێشمەرگەی هەولێر و یەکسان بوونی زاخۆ، شێروانە لە چوار یاریی داهاتووی پێویستی بە حەفت خاڵە بۆ ئەوەی بۆ یەکەمجار لە مێژوو ببێتە پاڵەوانی خولی نایابی کوردستان، شێروانە لە ریزبەندی یەکەم 50 خاڵی هەیە و گەڕی داهاتووش میوانداری چوارقوڕنە دەکات.

زاخۆ هەنگاوێک لە کێبڕکێی ناسناوەکە دوورکەوتەوە دوای یەکسان بوونی لەگەڵ دەربەندیخان بەبێ گۆڵ لە دەرەوەی یاریگای خۆی، بەم خاڵە زاخۆ هاتە ریزبەندی دووەمی خولەکە بە 43 خاڵ و پێشمەرگەی هەولێر بە هەمان خاڵ کەوتە ریزبەندی سێیەم، دەربەندیخانیش بە 34 خاڵ لە ریزبەندی پێنجەم دێت.

برایەتی دوای گەڕانەوەی یاریزانەکانی بۆ یارییکردن و شکاندنی بایکۆتیان لە مەشق و راهێنانی تیپەکە لە دەرەوەی یاریگای خۆی دوا خولەک گۆڵی یەکسانی لە سیروانی نوێ کرد و یارییەکەش 1 _ 1 کۆتایی هات، برایەتی 27 خاڵی هەیە و لە ریزبەندی 11ـەم دێت و مەترسی دابەزینی بۆ ریزی پلەیەکی لەسەر ماوە،  سیروانی نوێ 34 خاڵی هەیە لە ریزبەندی شەشەمی خولی نایابی کوردستان دێت.