دوای 96 رۆژ شەقڵاوە سەرکەوتنی لە خولی نایابی کوردستان بەدەست هێنا

یاریگا –

شەقڵاوە جارێکی تر دوای 96 رۆژ گەڕایەوە سەرکەوتن و لە یاریگای خۆی بە ئەنجامی 1 _ 0 لە هەندرێنی بردەوە.

لە گەڕی 25ـی خولی نایابی کوردستان، شەقڵاوە دوای 13گەڕ و 96 جارێکی تر گەڕایەوە سەرکەوتن و بە ئەنجامی 1 _ 0 لە هەندرێنی بردەوە، یەکەم شکستی هەندرێن بوو لە قۆناخی دووەمی خولی نایابی کوردستان دوای نۆ گەڕ، وێڕای سەرکەوتنی شەقڵاوە بە 22 خاڵ لە ریزبەندی 14 دێت و لە ناوچەی دابەزینە، هەندرێنیش بە 35 خاڵ لە ریزبەندی چوارەم مایەو.

پێشمەرگەی هەولێر بەردەوامە لە شکستەکانی و ئەمجارەیان لە دەرەوەی یاریگای خۆی 2 _ 1 بە چوارقوڕنە دۆڕا، لە ئەگەری سەرکەوتنی شێروانە بەرامبەر ئاکرێ جیاوازی دەبێتە نۆ خاڵ و نزیک دەبێتەوە لە بەدەستهێنانی ناسناوی ئەم وەرزە، پێشمەرگە 43 خاڵی هەیە لە ریزبەندی دووەمە و چوارقوڕنە بە 30 خاڵ هاتە ریزبەندی هەشتەمی خولەکە.

رزگاری دووەم یاریی لەسەر دەستی راهێنەری نوێ نەبردەوە و 0 _ 0 لە دەرەوەی یاریگای خۆی لەگەڵ رانیە یەکسان بوو، هەر دوو یانە لە گەڕەکانی داهاتوو پێویستیان بە سەرکەوتنە بۆ ئەوەی لە ناوچەی دابەزین بۆ ریزی پلەیەک رزگاریان بێت، رانیە 27 خاڵی هەیە لە ریزبەندی 11ـە و رزگاریش بە 30 خاڵ لە ریزبەندی نۆیەمی خولەکە دێت.

بەهۆی کشانەوەی سەیدسادق لە خولەکە پیشەسازی 3 _ 0 بەبراوە هەژمار کراو خاڵەکانی بووە 28 خاڵ و هاتە ریزبەندی 10ـەی خولی نایابی کوردستان.