باشترینەکانی مانگی ئاداری خولی نایابی کوردستان دەستنیشانکران

یاریگا –

باشترینەکانی مانگی رابردووی خولی نایابی کوردستان دەستنیشانکران و باشترین راهێنەر لە تیپەکانی ریزبەندی یەکەم و دووەم نیە.

دڵشاد مەعروف راهێنەری هەندرێن بە باشترین راهێنەر بۆ مانگی ئادار دەستنیشانکرا، دڵشاد مەعروف لەگەڵ هەندرێن لە مانگی رابردوودا لە کۆی چوار یاریی هەر چوار یارییەکە براوە بووە و پاڵەوانی قۆناخی دووەمی خولی نایابی کوردستانە و ئاستێکی نمونەیی پێشکەش دەکەن، لە نۆ یاریی قۆناخی دووەم هەندرێن هیچ شکستێکی نیە و هەشت سەرکەوتن و یەکسان بوونێکی هەیە.

فرانسیس دادزی هێرشبەری گانایی پێشمەرگەی هەولێر بە باشترین یاریزان بۆ مانگی رابردوو دەستنیشانکرا، هێرشبەرەکەی پێشمەرگەی هەولێر یارمەتی تیپەکەی داوە کە لە ریزبەندی دووەم جێگیر بێت و توانی شەش گۆڵیش تۆمار بکات.

گەیلان سادق گۆڵپارێزی هەندرێن بە باشترین گۆڵپارێزی مانگی ئادار دەستنیشانکرا، لە کوی چوار یاریی گەیلان سادق چوار کلین شیتی کرد و هیچ گۆڵێکی لێ تۆمار نەکرا، نەدیار عەلی سەرپەرشتیاری زاخۆ بە باشترین سەرپەرشتیاری تیپ بۆ مانگی رابردوو دەستنیشانکرا.