تەکنۆلۆجیای ئۆفسایدی نیمچە خۆکارانە چییە و کەی لە پرێمەرلیگ پەیڕەو دەکرێت؟

یاریگا –

پرێمەرلیگ بەکارهێنانی تەکنۆلۆجیای ئۆفسایدی نیمچە خۆکارانە لەم وەرزەدا دووپاتکردەوە.

بڕیارە لە گەڕی 32 کار بە تەکنۆلۆجیای ئۆفسایدی نیمچە خۆکارانە (ئۆتۆماتیک) بکرێت و یەکەمجار لە یاریگای ئیتیحاد لە یاریی نێوان مانچێستەر سیتی و کریستال پاڵاس پەیڕەو دەکرێت.

سیستمە نوێیەکەی ئۆفساید بۆ یەکەمجار لە قۆناخی پێنجەمی جامی FA جێبەجێکرا، هەروەها لە قۆناخی چارەکی کۆتایی پاڵەوانیەتییەکەش کاریپێکرا.

لە بەیاننامەی پرێمەرلیگدا هاتووە

12ی ئەم مانگە و لە گەڕی 32ی پرێمەرلیگ، کار بە تەکنۆلۆجیای ئۆفسایدی نیمچە خۆکارانە دەکرێت. بڕیارەکە دوای سەرکەوتنی تاقیکردنەوەی سیستمەکە لە جامی FA دراوە.

تەکنۆلۆجیاکە رۆڵێکی یەکلاییکەرەوە لە بڕیاری ئۆفساید دەگێڕێت و یارمەتی ناوبژیوانانی ڤار دەدات. سیستمەکە وێنەی ورد و باشتری حاڵەتەکان بۆ ناوبژیوانانی ڤار ئامادە دەکات، هەروەها هاندەران زۆر بەباشی حاڵەتەکیان بۆ رووندەبێتەوە.

پرێمەرلیگ بە هاوکاری دەستەی ناوبژیوانان، داتای وەرزشی و کۆمپانیای جینیس بۆ وەرزش، تەکنۆلۆجیاکەی بەرهەمهێناوە.

هەرچەندە لە ساڵی 2022 تەکنۆلۆجیاکە بەردەستە، بەڵام لەم وەرزەدا بڕیاری بەکارهێنانی لە تۆپی پێی ئینگلیزی دراوە.

سیستمەکە لە مۆندیالی 2022ی قەتەڕ، مۆندیالی خانمان و یۆرۆی 2024 پەیڕەوکرا. هەروەها لە وەرزی 2022-23 لە چامپیۆنزلیگ کاری پێدەکرێت و لە سەرەتای ساڵی 2023شەوە لە سێریا ئەی هەیە، لە سەرەتای ئەم وەرزەش لە لالیگا پەیڕەو دەکرێت.

تەکنۆلۆجیاکە چۆن کاردەکات؟

لەگەڵ دروستبوونی گومان لەسەر هەر حاڵەتێک، سیستمەکە دەگەڕێتەوە خاڵی دەستپێکی دەرکەوتنی تۆپ و بەشێوەیەکی ئۆتۆماتیک، هێڵەکانی ئۆفساید دروستدەکات و مەودای نێوان بەرگریکار و هێرشبەران دەپیوێت.

بەگوێرەی داتاکانی بەردەستی پرێمەرلیگ بێت، هەر حاڵەتێکی گوماناوی پێویستی بە 31 چرکەیە تاوەکو یەکلاییببێتەوە.

دوای دوا هەڵسەنگاندن و پەسندکردنی لەلایەن ژووری ڤار، سیستمەکە خۆکارانە لە شاشەی گەورەی یاریگاکان، حاڵەتەکە رووندەکاتەوە.

زیاتر لە 30 کامێرا لە دەوروبەری تەواوی یاریگاکانی پرێمەرلیگ بۆ پاڵپشتی سیستمەکە دادەندرێن، کامێراکان 100 فرەیم لە یەک چرکەدا دەچرکێنێت، ئەمەش وێنەکە زۆر بەڕوونی دەردەخات.