یاریگا –
رۆبێرتۆ مارتینێز، راهێنەری ئیسپانی هەڵبژاردەی پۆرتوگال وەڵامی رەخنەكان دەربارەی گۆڕانكاری پێنەكردنی كریستیانۆ رۆناڵدۆ دەداتەوە.
شەوی رابردوو دانیمارك لە یاریگای خۆیدا میوانداری پۆرتوگالی كرد و یارییەكەش بە تاكە گۆڵێكی راسموس هۆیلوند لە بەرژەوەندی خاوەن ماڵ كۆتاییهات.
لەو یارییەدا كریستیانۆ رۆناڵدۆی تەمەن 40 ساڵان بە درێژایی یارییەكە یاریكرد و لەلایەن راهێنەرەوە گۆڕانكاری پێنەكرا.
لە دوای یارییەكە رۆبێرتۆ مارتینێز گوتی:
هیچ هۆكارێک نەبوو بۆ ئەوەی كریستیانۆ رۆنالدۆ گۆڕانكاری پێبكەم، لە كاتێكدا كە هۆكاری هیچ كێشەیەک نەبووە كە پەیوەندی بە گۆڵ نەكردنەوە هەبێت.
رۆناڵدۆ لەو جێگایانە بوو كە چاوەڕێمان دەكرد و دەمانویست، بەردەوام ئامادەبوو بۆ ئەوەی هەلی گۆڵكردن بەدەستبهێنێت، بۆ منیش كێشەی ئاستی هێرشبەری پۆرتوگال نەبوو.
چاوەڕوان دەكرێت پاش سێ رۆژی دیكە یاریی گەڕانەوە لە نێوان هەردوو هەڵبژاردە لە پۆرتوگال بكرێت.
