یاریگا –
بارسێلۆنا و لیڤاندۆڤسکی گەیشتوونەتە رێککەوتن هێرشبەرە پۆڵەندییەکە وەرزێکی دیکەش لە یانە کەتەلۆنییەکە بەردەوام دەىیت.
رۆژنامەی موندۆ دیپۆرتڤۆی کەتەلۆنی ئاشکرایکردووە، رۆبێرت لیڤاندۆڤسکی وەرزێکی دیکەش لە بارسێلۆنا بەردەوام دەبێت، هەردوولا نزیکن بگەنە رێککەوتنی کۆتایی، بۆ ئەوەی هێرشبەرە پۆڵەندییەکە وەرزی داهاتووش لە بلاوگرانا بەردەوام بێت، کە هاوینی 2022 پەیوەندی بە ریزەکانی یانە ئیسپانییەکە کرد.
موندۆ دیپۆرتیڤۆ راشیگەیاندووە، لیڤاندۆڤسکی بڕیاریداوە وەرزێکی دیکەش لە بارسا بمێنێتەوە کە گرێبەستەکەی هاوینی داهاتوو ئارەزوومەندانە دەتوانرێت تاوەکو هاوینی 2026 درێژ بکرێتەوە.
🚨 𝐍𝐨𝐭𝐢𝐜𝐢𝐚 𝐌𝐃: Robert Lewandowski seguirá una temporada más en el FC Barcelona
✅ Ya tiene un acuerdo cerrado con el Barça
🤝 Antes de que se activase su renovación de forma automática disputando la mitad de los partidos, el delantero polaco y el club azulgrana… pic.twitter.com/yfiY9Fjw1O
— Mundo Deportivo (@mundodeportivo) February 12, 2025
لیڤاندۆڤسکی کە یەکێکە لە چەکە کاریگەرەکانی هانزی فلیک لەم وەرزە لە لالیگا لە 22 یاری 19 گۆڵ و 2 ئەسیستی کردووە و پێشەنگی گۆڵکارانی خولەکەی گرتووە، لە سەرجەم پاڵەوانێتییەکان لەم وەرزە بە درێسی بارسا لە 33 یاری 31 گۆڵ و 4 ئەسیستی کردووە.
هێرشبەرە 36 ساڵانەکە کە هاوینی داهاتوو تەمەنی دەبێتە 37 ساڵ، پێشوەختە لەگەڵ بارسێلۆنا گەیشتووەتە رێککەوتن ئەگەر بەشداریی نیوەی یارییەکانی ئەم وەرزە بکات راستەوخۆ گرێبەستەکەی بۆ ساڵێکی دیکە درێژ بکرێتەوە.
هێرشبەرەکەی پێشووی بایرن میونشن و بۆڕووسیا دۆرتموند لەوەتەی پەیوەندی بە بارسێلۆناوە کردووە، نازناوێکی لالیگا و دوو جامی سوپەری ئیسپانیای بۆ یانە کەتەلۆنییەکە بەدەستهێناوە.
