ناپۆلی ئۆفەرێکی بۆ فرۆشتنی ئۆسیمین رەتکردەوە
یاریگا –
یانەی ناپۆلی ئۆفەرێکی پێشهاتووی بۆ فرۆشتنی ڤیکتۆر ئۆسیمین رەتکردەوە.
ئەستێرە نەیجیریەکە لە ساڵی 2020 تا هاوینی 2024 درێسی ئەو یانە ئیتاڵیەی پۆشی. بەڵام ناکۆکی کەوتە نێوان ئەو یاریزانە و ناپۆلی و سەرەنجام هاوینی رابردوو بەخواستن نێردرایە ریزەکانی گالاتاسەرای تورکی. ئەوە سەرەڕای ئەوەی ناوبراو گرێبەستەکەی لە ناپۆلی بۆ نوێکرابووەوە تا ساڵی 2026 بە جێگیرکردنی مەرجێک بۆ هەڵوەشاندنەوەی کە بڕەکەی 130 ملیۆن یۆرۆ بوو.
ناپۆلی نایەوێ بە نرخێکی کەم هێرشبەرەکەی بفرۆشێت، هاوکات ترسی لەوەش هەیە وردە وردە بەهای لە بازاڕەکەدا دابەزێت. ئەوە جگە لەوەی کە بە نزیکبوونەوەی زیاتر لە وادەی کۆتاییهاتنی گرێبەستەکەی، ترسی هەیە بەخۆڕایی یانەکە جێبهێڵێ.
بەگوێرەی نوێتری زانیاریی کە رۆژنامەی کۆریێری دێلۆ سپۆرتی ئیتاڵی ئاشکرایکردووە، یانەی گالاتاسەرای بڕی 65 ملیۆن یۆرۆی پێشکەشی ناپۆلی کردووە بۆ بە هەمیشەییکردنی گواستنەوەی گۆڵکارە نەیجیرییەکە، بەڵام لایەنی ئیتاڵی رەتیکردووەتەوە.
ئەو هەواڵە لەکاتێکدایە کۆتاییەکانی مانگی رابردوو سەرچاوەی هەواڵی TBRی ئینگلیزی بڵاویکردەوە ناپۆلی یاریزانەکەی پێشکەشی مانجێستەر یونایتد کردووە، بەڵام نەک تەنها بڕە پارە، بەڵکو هاوکات هێنانی یەکێک لە هێرشبەرەکانی یانە ئینگلیزیەکە لە مامەڵەکەدا.
