وێنە | بازیان لە خولی پلە یەکی کوردستان بە شێوازێکی جیاواز پێکهاتەی یانەکەی رادەگەیەنێت

یاریگا –

یانەی بازیان لەم وەرزەی خولی پلەیەکی کوردستان هەر یارییەک لە رێگای کەسانی جیاواز پێکهاتەی سەرەکی یارییەکانی رادەگەیەنێت.

بەشی راگەیاندنی یانەی بازیان لەم وەرزەی خولی پلەیەکی کوردستان، هەر جارێک بە شێوازێکی جیاواز پێکهاتەی سەرەکی یانەکە بۆ یارییەکان ئاشکرا دەکات، لە هەر پێنج گەڕەکە کەسانی جیاواز پێکهاتەی سەرەکی یانەکەیان راگەیاندووە.

بۆ یاریی ئەمڕۆیان بەرامبەر رواندز لە گەڕی پێنجەمی خولی پلەیەکی کوردستان، پێکهاتەکەیان لە رێگەی کارمەندێکی شارەوانی قەزاکەوە بڵاوکردەوە.

بازیان لەم وەرزەی خولی پلەیەکی کوردستان، بە کۆکردنەوەی 8 خاڵ پلەی دووەمی گرتووە، لە چوار یاری دوو بردنەوەی بەدەستهێناوە و خاڵێک لەدواوەی زانکۆی جیهان پێشەنگی خولەکە دێت.

لە گەڕی رابردوو، بازیان لە رێگای کارمەندێکی ئاگرکوژێنەوەی شارۆچکەکەیان پێکهاتەی سەرەکی یانەکەیان بۆ یاریی بەرامبەر سۆران راگەیاند، کە هەردوولا بەبێ گۆڵ یەکسانبوون.

لە گەڕی سێیەمی خولی پلەیەکی کوردستان، بازیان لە رێگای هاووڵاتییەکی کورتەباڵای شارەکەیان پێکهاتەی سەرەکی یانەکەیانی بۆ یاریی بەرامبەر هەڵۆ ئاشکراکرد، یانەی بازیان لە هەژماری خۆی لە فەیسبووک پێش ئەو یارییە کە 2-0 بردنەوەیان بەدەستهێنا، نووسیویەتی :’کاکە عەبدوڵا پیاوە جوان و قسە خۆش و دەم بە خەندەکەی قەزاکەمان پێکھاتەی سەرەکی یانەی بازیان بەرامبەر یانەی ھەڵۆتان پێدەڵێت’.

لە گەڕی دووەمیش پێش یارییەکەی شۆرجە، یانەکەی دەڤەری سلێمانی لە رێگای منداڵێکی خاوەن پێداویستی تایبەت پێکهاتەی یانەکەی راگەیاند کە ئەو یارییە 1-1 کۆتایی هات، یانەی بازیان نووسیویەتی :’کاکە لاوە منداڵە دڵپاک و خۆشەویستەکەی یانەکەمان خەلکی بازیان بەو پەڕی فەخر و شانازییەوە پێکھاتەی سەرەکی یانەی بازیان بەرامبەر یانەی شۆرجەتان پێدەڵێت’.

لە گەڕی یەکەمیش، بازیان لە رێگای ئیسماعیل ئەحمەد قایمقامی قەزای بازیانەوە پێکهاتەی سەرەکی یانەکەیان بۆ یاریی بەرامبەر کفری راگەیاند، کە بازیان 2-0 ئەو یارییەی لە کفری بردەوە.